جہلم: ڈی سی جہلم سیدہ رملہ علی کا روہتاس روڈ پر جاری تجاوزات آپریشن اور نئی سڑک کے کام کا جائزہ، آپریشن تیز کرنے کی ہدایت، ماڈرن ریڑھی بازار، میونسپل نرسری اور شاندارچوک کے دورہ کے دوران ریڑھی بازار کو مزید وسیع کرنے اور ٹریفک پلان پر بریفنگ لی۔
تفصیلات کے مطابق ڈپٹی کمشنر جہلم نے روہتاس روڈ پر جاری تجاوزات آپریشن اور نالوں کی صفائی مہم کا جائزہ لیتے ہوئے میونسپل افسران کو ہدایت کی کہ تجاوزات کے خلاف بلا تفریق آپریشن تیز کیا جائے اور کسی قسم کی روکاوٹ برداشت نہ کی جائے۔
انہوں نے اس موقع پر روڈ کے ایک حصے پر جاری تعمیراتی کام کا مشاہدہ کیا اور تعمیراتی کام کے دوران معیار کو ہر صورت یقینی بنانے اور شہریوں کو زیادہ سے زیادہ ریلیف دینے کا حکم دیا۔
بعد ازاں ڈپٹی کمشنر جہلم سیدہ رملہ علی نے ماڈرن ریڑھی بازار، شاندار چوک، میونسپل نرسری کا دورہ کیا جہاں میونسپل افسران نے ڈی سی جہلم کو ماڈرن ریڑھی بازار پر بریفنگ دی اس کو مزید وسیع کرنے بارے لائحہ عمل تیار کرنے کی ہدایت ڈی سی جہلم نے کی۔
میونسپل نرسری کے قیام کو سراہتے ہوئے ڈی سی جہلم نے پودوں کی مزید تعداد کی فراہمی یقینی بنانے کی ضرورت پر زور دیا۔
