پنڈدادنخان میں بارش کے باعث دو مختلف واقعات میں گھروں کی چھتیں گرنے سے ماں بیٹے سمیت چار افراد زخمی ہو گئے۔
تفصیلات کے مطابق جہلم کی تحصیل پنڈدادنخان میں بارش اور آندھی کے باعث دو مختلف مقامات پر گھروں کی چھتیں گر گئیں، جس کے نتیجے میں ماں بیٹے سمیت چار افراد زخمی ہو گئے۔
ریسکیو 1122 کے مطابق پہلا واقعہ پنڈدادنخان کی نواحی بستی کھیوڑہ کے محلہ کھریال میں پیش آیا، جہاں بارش کے باعث ایک بوسیدہ مکان کی چھت زمین بوس ہو گئی۔ حادثے میں 40 سالہ فہمیدہ بیگم زوجہ طارق جاوید اور ان کا 19 سالہ بیٹا عبد الرحمن ولد طارق جاوید ملبے تلے دب کر زخمی ہو گئے۔
ریسکیو ٹیم نے بروقت کارروائی کرتے ہوئے دونوں زخمیوں کو ملبے سے نکالا، ابتدائی طبی امداد فراہم کی، اور بعد ازاں تحصیل ہیڈ کوارٹر اسپتال پنڈدادنخان منتقل کر دیا گیا۔
دوسرا واقعہ پنڈدادنخان کے محلہ خیر شاہ میں پیش آیا، جہاں ایک پرانا مکان بارش کے باعث منہدم ہو گیا۔ چھت گرنے کے نتیجے میں دو افراد زخمی ہوئے جنہیں فوری طور پر اسپتال منتقل کیا گیا۔ ریسکیو اہلکاروں نے موقع پر پہنچ کر امدادی کارروائیاں سرانجام دیں اور زخمیوں کو ابتدائی طبی امداد دی۔
