برسلز: بلجیم، لکسمبرگ اور یورپی یونین میں سفیر پاکستان آمنہ بلوچ نے جامعہ اسلامیہ مولن بیک برسلز میں پاکستانی کمیونٹی کے زیر اہتمام محفلِ میلاد النبی ﷺ میں شرکت کی۔
تقریب کا آغاز تلاوت قرآن پاک، نعتوں اور تقاریر سے کیا گیا جس میں حضور اکرمﷺ کی زندگی اور سنت کے مختلف پہلوؤں پر روشنی ڈالی گئی۔
تقریب میں پاکستانی کمیونٹی کے ارکان، مذہبی اسکالرز، جامعہ کے طلباء اور سفارتخانے کے حکام نے شرکت کی۔ علمائے کرام نے اپنے خطابات میں سیرت النبیﷺکے مختلف پہلوؤں پر روشنی ڈالی اور امت مسلمہ کی خیر خواہی کے لیے دعائیں کیں۔
اس موقع پر سفیر پاکستان آمنہ بلوچ نے اپنے خطاب میں کہا کہ حضورﷺ کی پوری زندگی ہم سب کیلئے بہترین نمونہ ہے۔ حضرت محمد ﷺکی رواداری، امن، ہمدردی، استقامت، عاجزی، دیانت اور سخاوت کی تعلیمات پر عمل پیرا ہو کر ہم دنیا اور آخرت دونوں میں کامیابی حاصل کر سکتے ہیں۔
انہوں نے خواتین کو بااختیار بنانے اور انہیں زندگی کے تمام شعبوں میں یکساں مواقع فراہم کرنے کی اہمیت پر زور دیا۔ رسولﷺ کی پیاری بیٹی بی بی فاطمہ رضی اللہ عنہا کی طرف توجہ مبذول کراتے ہوئے سفیر آمنہ بلوچ نے سماجی انصاف، ہمدردی اور علم کیلئےان کے غیر متزلزل عزم کی تعریف کی۔
انہوں نے اس بات پر زور دیا کہ بی بی فاطمہ (رضی اللہ عنہا) نے مسلم خواتین کیلئے ایک غیر معمولی رول ماڈل کے طور پر کام کیا جو طاقت، لچک اور خاندان اور برادری کیلئے لگن کی مثال ہے۔ انہوں نے پیغمبر اسلامﷺ کی زوجہ محترمہ حضرت بی بی سیدہ عائشہ رضی اللہ عنہا کی حیات طیبہ پر بھی روشنی ڈالی۔
انہوں نے کہا کہ حضرت عائشہ (رضی اللہ عنہا) کی بے مثال ذہانت، اسلامی تعلیمات کے بارے میں ان کی گہری سمجھ، دنیا بھر کے مسلمانوں کی نسلوں کو متاثر کرتی رہے گی۔
انہوں نے زور دے کر کہا کہ ان شاندار مثالوں پر عمل پیرا ہو کر ہم خواتین کی بے پناہ صلاحیتوں کو بروئے کار لا سکتے ہیں اور انہیں معاشرے کی ترقی اور خوشحالی میں اپنا بھرپور کردار ادا کرنے کے قابل بنا سکتے ہیں۔
آخر میں سفیر پاکستان نے تقریب میں شریک خواتین و حضرات پر زور دیا کہ وہ صنفی مساوات کو فروغ دیں، معیاری تعلیم تک رسائی کو یقینی بنائیں اور ایسا ماحول بنائیں جو خواتین کی ترقی کیلئے انہیں مساوی مواقع فراہم کرنے کو فروغ دے۔
انہوں نے اس امید کا اظہار کیا کہ اسلام میں خواتین کے بااثر کردار کو تسلیم کرتے ہوئے، ہم اجتماعی طور پر ایک زیادہ مساوی اور جامع معاشرے کیلئے کام کر سکتے ہیں۔
اس موقع پر سفیر پاکستان آمنہ بلوچ نے جامعہ اسلامیہ مولن بیک میں کامیابی سے کورس مکمل کرنے والے طلباء میں انعامات اور اسناد تقسیم کیں۔
