جہلم: ڈی پی او جہلم ناصر محمود باجوہ کی خصوصی ہدایت پر جہلم پولیس نے رمضان المبارک کے مقدس اور بابرکت مہینے میں امن و امان برقرار رکھنے اور شہریوں کے بحفاظت مذہبی فرائض کی انجام دہی کے لئے سکیورٹی پلان جاری کر دیا۔
ترجمان جہلم پولیس کے مطابق ضلع جہلم میں 159 مساجد پرسخت سکیورٹی انتظامات کو یقینی بنایا جائے گا، ضلع بھر کی مساجد کو حساسیت کے لحاظ سے اے، بی اور سی کیٹیگریز میں تقسیم کیا گیا ہے۔
ترجمان جہلم پولیس نے بتایا کہ جہلم پولیس کی جانب سے 300 سے زائد پولیس افسران رمضان المبارک کے دوران سکیورٹی ڈیوٹی جبکہ ایلیٹ پولیس فورس کے 6 سیکشن شہری آبادی میں پیٹرولنگ کے فرائض سرانجام دیں گے۔ رمضان المبارک میں رش کی جگہوں پر ٹریفک کو رواں دواں رکھنے کے لیے ٹریفک پولیس افسران بھی فرائض منصبی مستعدی سے سر انجام دیں گے۔
اس حوالے سے ڈی پی او جہلم ناصر محمود باجوہ نے کہا کہ رمضان المبارک کے دوران رمضان بازار، عبادت گاہوں، سحری و افطاری اور تراویح کے اوقات میں محافظ اسکواڈ،ایلیٹ فورس اور تھانہ جات کی گاڑیاں گشت کریں گی۔
انہوں نے کہا کہ تمام سپروائزری افسران اور ایس ایچ اوز اپنے اپنے علاقہ میں امن و امان قائم رکھیں گے اور سیکیورٹی ڈیوٹی پر تعینات ڈیوٹیوں کو چیک اور بریف کریں گے۔ سخت سکیورٹی انتظامات کا مقصد ضلع بھر میں امن امان کا قیام اور دوران رمضان المبارک شہریوں کو تحفظ کا احساس دلانا ہے۔
ڈی پی او جہلم ناصر محمود باجوہ نے مزید کہا کہ شہری اپنے گردو نواح میں موجود مشکوک اشخاص اور مشکوک سرگرمیوں کی اطلاع پولیس کو دیں ، امن عامہ کے قیام میں عوام جہلم پولیس کا ساتھ دیں۔
