جہلم شہر میں صفائی کے نظام میں نمایاں بہتری آ چکی ہے اور ستھرا پنجاب مہم کے تحت اس میں مزید بہتری کے لیے مسلسل اقدامات کیے جا رہے ہیں۔
ان خیالات کا اظہار ڈپٹی کمشنر جہلم سید محمد میثم عباس نے یونین کونسل نمبر 16 اور 17 کے دورہ کے دوران کیا، جہاں وہ صفائی کی صورتِ حال کا خود جائزہ لے رہے تھے۔
ڈپٹی کمشنر نے مختلف علاقوں میں صفائی کے کام کا معائنہ کیا اور موقع پر موجود راولپنڈی ویسٹ مینجمنٹ کمپنی کے اہلکاروں سے ملاقات کرتے ہوئے انہیں ہدایات جاری کیں کہ تمام یونین کونسلوں میں ہر گلی اور ہر محلے سے کچرے کے ڈھیر فوری طور پر ختم کیے جائیں، تاکہ شہریوں کو ایک صاف ستھرا اور صحت مند ماحول فراہم کیا جا سکے۔
انہوں نے کہا کہ حکومت پنجاب کی جانب سے شروع کی گئی ستھرا پنجاب مہم کا بنیادی مقصد عوام کو صاف ماحول مہیا کرنا ہے، اور اس ہدف کے حصول کے لیے تمام وسائل بروئے کار لائے جا رہے ہیں۔ انہوں نے صفائی کے عملے کی کارکردگی کو سراہتے ہوئے زور دیا کہ صفائی کا معیار برقرار رکھا جائے اور اس میں مزید بہتری لانے کی کوشش کی جائے۔
