سابق وفاقی وزیر فواد چوہدری نے کہا ہے کہ ہاتھیوں کی لڑائی میں گھاس خراب ہو رہی ہے، ان کی آپسی لڑائی میں عوام کچلی جا رہی ہے۔ ملک میں افراتفری کا منظر ہے، ایسے میں کسی سے کیا بات ہو سکتی ہے۔ ملک میں کسان خسارے میں ہیں، بجلی پٹرول کی کھپت میں کمی آگئی ہے، ملک کے حالات نارمل ہونے چاہئیں۔
لاہور ہائیکورٹ میں پیشی کے موقع پر میڈیا سے گفتگو کرتے ہوئے سابق وفاقی وزیر اطلاعات و نشریات فواد چوہدری نے کہا ہے کہ ملک میں افراتفری کا ماحول ہے ایسے میں کسی سے کیا بات ہو سکتی ہے، ہاتھیوں کی لڑائی میں نقصان ہمیشہ چینوٹی اور گھاس کا ہی ہوتا اور ایسا ہی کچھ حال پاکستان کی عوام کا ہے، ان کی آپس کی لڑائی میں عوام کچلی جارہی ہے اور جب ہر طرف ٹینشن ہوگی تو ملک کیسے آگے بڑھے گا۔
انہوں نے کہا کہ تلخیاں اتنی زیادہ ہیں نا کوئی بات سن رہا ہے نا کوئی بات سمجھ رہا ہے، تلخیوں کے ماحول میں ملک آگے نہیں بڑھ سکتا، حالاتِ اتنے برے ہیں کسان کی گندم نہیں بک رہی، تاجروں کی دوکانیں بند ہورہی ہیں اوپر سے ایف بی آر والے آئے ہوئے ہیں، پاکستان کے اندر سرمایہ کاری آپ کے سامنے ہے، آپ اس سے اندازہ کرلیں کہ 7 اعشاریہ 6 فیصد بجلی کی کھپت میں کمی ہوچکی ہے۔
قبل ازیں لاہور ہائیکورٹ میں فواد چوہدری کے خلاف درج مقدمات میں ویڈیو لنک کے ذریعے حاضری لگوانے کی درخواست پر سماعت ہوئی، چیف جسٹس لاہور ہائیکورٹ جسٹس ملک شہزاد احمد خان نے سابق وفاقی وزیر فواد چوہدری کی درخواست پر سماعت کی، چیف جسٹس نے استفسار کیا کہ ’آپ یہ بتائیں کہ آپ پر دہشت گردی کے کتنے مقدمات درج ہیں؟‘، فواد چوہدری کے وکیل نے بتایا کہ ’دو کیسز کے علاوہ تمام کیسز دہشت گردی کے ہیں‘۔
اس موقع پر فواد چوہدری خود روسٹرم پر آئے جس پر چیف جسٹس لاہور ہائیکورٹ نے کہا کہ ’چوہدری صاحب لگتا ہے کہ آپ کو اپنے وکیل پر اعتبار نہیں ہے‘، فواد چوہدری جواب دیا کہ ’میں صرف حقائق بتانا چاہتا ہوں، مجھے پر 47 مقدمات درج ہیں‘، چیف جسٹس نے استفسار کیا کہ ’آپ نے خود بحث کرنی ہے تو پھر ہمیں بتا دیں‘۔
اس کے بعد فواد چوہدری اپنی نشست پر بیٹھ گئے جب کہ چیف جسٹس لاہور ہائیکورٹ نے ان کے وکیل سے چیف جسٹس لاہور ہائیکورٹ نے پوچھا کہ ’آپ یہ بتائیں کہ قانون میں کہاں لکھا ہے کہ ملزم کو ویڈیو لنک کی حاضری کی اجازت ہے؟ قانون کہتا ہے کہ ملزم اور گواہ کے تحفظ کے لیے حاضری ویڈیو لنک پر ہوسکتی ہے‘۔
چیف جسٹس نے استفسار کیا کہ ’آپ کو کس سے خطرہ ہے؟‘ فواد چوہدری کے وکیل جواب دیا کہ ’خطرہ یہ ہے کہ ایک ہی دن میں دو مختلف شہروں میں پیشی ہے، یہ انسانی طور پر ممکن ہی نہیں ہے کہ ایک بندہ ایک وقت میں دو مختلف شہروں میں پیش ہو‘، چیف جسٹس لاہور ہائیکورٹ نے ریمارکس دیئے کہ ’آپ کی بات ٹھیک ہے مگر قانون یہ نہیں کہتا‘۔
بعد ازاں لاہور ہائیکورٹ نے فواد چوہدری کے وکیل کو تیاری کے لیے مزید مہلت دے دی اور عدالت نے کارروائی 16 مئی تک ملتوی کر دی۔
