جہلم: وفاقی وزیر مملکت برائے ریلوے و خزانہ بلال اظہر کیانی نے سیلاب سے متاثرہ علاقوں اور فلڈ ریلیف کیمپ خورد کا دورہ کیا، جہاں انہوں نے متاثرہ خاندانوں سے ملاقات کی اور ضلعی انتظامیہ سے جاری امدادی سرگرمیوں پر بریفنگ لی۔
دورے کے دوران ڈپٹی کمشنر جہلم میثم عباس اور ایڈیشنل ڈپٹی کمشنر ریونیو سنیہ صافی نے وفاقی وزیر کو متاثرہ گھروں، سڑکوں اور پلوں کی صورتحال اور بحالی کے لیے جاری اقدامات پر تفصیلی بریفنگ دی۔
وفاقی وزیر بلال اظہر کیانی نے موضع خورد میں قائم فلڈ ریلیف کیمپ کا معائنہ کیا اور کیمپ میں مقیم متاثرین سے ملاقات کی، ان کے مسائل اور سہولیات کے بارے میں دریافت کیا۔ انہوں نے ضلعی انتظامیہ کو ہدایت کی کہ متاثرہ شہریوں کو کھانے پینے، رہائش اور طبی سہولیات کی مکمل فراہمی یقینی بنائی جائے اور ان کی جلد از جلد گھروں کو واپسی ممکن بنائی جائے۔
انہوں نے کہا کہ وزیر اعظم پاکستان اور وزیر اعلیٰ پنجاب مریم نواز کی ہدایت پر تمام متاثرین کی بحالی کے لیے بھرپور کام جاری ہے۔ جاں بحق ہونے والوں کے لواحقین کو فی کس 10 لاکھ روپے، زخمیوں کو ایک لاکھ روپے جبکہ گھروں کے نقصان کی صورت میں 5 لاکھ روپے تک مالی امداد دی جائے گی۔ متاثرہ سڑکوں اور پلوں کی مرمت تیزی سے جاری ہے اور چند روز میں ٹرانسپورٹ اور آمد و رفت مکمل بحال کر دی جائے گی۔
وفاقی وزیر نے متاثرین کو یقین دہانی کرائی کہ حکومت ان کے ساتھ کھڑی ہے اور مکمل بحالی تک امدادی سرگرمیاں جاری رہیں گی۔
