دینہ پولیس نے بڑی کامیابی حاصل کرتے ہوئے دوکان کے تالے توڑ کر لاکر سمیت 15 لاکھ روپے نقدی لوٹنے والے مرکزی ملزم کو گرفتار کر لیا۔ پولیس نے 5 لاکھ 50 ہزار روپے نقدی اور لاکر بھی برآمد کر لیا جبکہ دیگر ملزمان کی گرفتاری کے لیے چھاپے جاری ہیں۔
تفصیلات کے مطابق چند روز قبل جہلم کی تحصیل دینہ کے مصروف ترین داتا روڈ پر علی الصبح تاجر فیضان علی شاہ ولد سید اخلاق حسین شاہ سکنہ ہڈالہ دینہ کی دوکان کے تالے توڑ کر نامعلوم چور 15 لاکھ روپے نقدی اور لاکر لے کر فرار ہوگئے تھے۔ متاثرہ مالک کی درخواست پر پولیس نے فوری مقدمہ درج کر کے ملزمان کی تلاش شروع کر دی تھی۔
ڈی پی او جہلم کی ہدایت پر ایس ایچ او تھانہ دینہ سید احسان شاہ اور انچارج پولیس سٹی چوکی دینہ ملک محمد سجاد نے کارروائی کرتے ہوئے ملزم فاروق علی سکنہ وہاڑی کو گرفتار کر لیا۔ ملزم کے قبضے سے 5 لاکھ 50 ہزار روپے نقدی اور لاکر بھی برآمد کر لیا گیا ہے۔
پولیس کے مطابق دیگر ملزمان کی گرفتاری کے لیے مزید چھاپے مارے جا رہے ہیں۔ اس کامیاب کارروائی پر دینہ کے تاجروں نے ایس ایچ او سید احسان شاہ اور انچارج پولیس سٹی چوکی دینہ ملک محمد سجاد کو خراج تحسین پیش کیا۔
اس موقع پر ڈسٹرکٹ پولیس آفیسر طارق عزیز سندھو نے کہا کہ شہریوں کو ان کے قیمتی اثاثوں سے محروم کرنے والے ملزمان کسی رعایت کے مستحق نہیں ہیں اور ایسے عناصر کے خلاف سخت قانونی کارروائی جاری رکھی جائے گی۔
