پنڈدادنخان: اسسٹنٹ کمشنر و ایڈمنسٹریٹر نادیہ پروین نے چیف آفیسر ملک حسیب کے ہمراہ پنڈدادنخان کے مین بازار کا تفصیلی دورہ کیا اور بیوٹیفکیشن آف بازار پراجیکٹ کے تحت جاری ترقیاتی کاموں کا جائزہ لیا۔
دورے کے دوران اسسٹنٹ کمشنر نادیہ پروین نے تعمیراتی کاموں کے معیار اور رفتار کا باریک بینی سے معائنہ کیا۔ انہوں نے موقع پر موجود کنٹریکٹرز اور متعلقہ حکام کو سخت ہدایات جاری کرتے ہوئے کہا کہ منصوبے کو ہر صورت مقررہ مدت میں مکمل کیا جائے اور معیار پر کسی قسم کا سمجھوتہ برداشت نہیں کیا جائے گا تاکہ شہریوں کو طویل مدتی اور پائیدار سہولیات میسر آ سکیں۔
انہوں نے تعمیراتی کام کے دوران عوامی نقل و حمل میں ممکنہ خلل کو کم سے کم رکھنے کی بھی ہدایت کی اور کہا کہ بازار آنے والے شہریوں اور تاجروں کی سہولت کو اولین ترجیح دی جائے۔
اس موقع پر گفتگو کرتے ہوئے نادیہ پروین نے کہا کہ ضلعی انتظامیہ شہر کی خوبصورتی میں اضافے اور عوامی سہولیات کی بہتری کے لیے تمام دستیاب وسائل بروئے کار لا رہی ہے۔ ان منصوبوں کا مقصد شہریوں کو بہتر ماحول فراہم کرنا اور تجارتی مراکز کی حالتِ زار کو بہتر بنانا ہے۔
چیف آفیسر ملک حسیب نے اسسٹنٹ کمشنر کو منصوبے کی تکنیکی تفصیلات اور اب تک کی پیش رفت سے آگاہ کیا۔ شہریوں اور تاجروں نے انتظامیہ کی اس کاوش کو سراہتے ہوئے امید ظاہر کی کہ بازار کی تزئین و آرائش سے کاروباری سرگرمیوں میں اضافہ ہوگا اور شہر کا مجموعی تشخص بہتر ہو گا۔
