سوہاوہ کے نواحی علاقہ میں 23 سالہ نوبیاہتا دلہے کو قتل کروانے والے قاتل کو گرفتار کر لیا گیا۔
تفصیلات کے مطابق رواں سال مئی میں جہلم کی تحصیل سوہاوہ کے علاقہ آڑا سسرال میں 23 سالہ نوبیاہتا دلہا شاہ زیب کو گھر کے دروازے پر ساتھیوں سے فائرنگ کر کے مبینہ طور پر قتل کروانے والے قاتل محمد علی کو ایس ایچ او سوہاوہ محمد عمران اوران کی ٹیم نے گرفتار کر لیا۔
پولیس تھانہ سوہاوہ نے بہترین حکمت عملی اپناتے ہوئے قتل کے مقدمہ میں ملوث آخری ملزم محمد علی کو بھی گرفتار کر لیا ہے۔ ملزم 23 سالہ شاہ زیب کے قتل کے مقدمہ میں اعانت کنندہ اور سہولت کار تھا۔ سوہاوہ پولیس نے ملزم محمد علی کو تھانے منتقل کرکے مزید تفتیش شروع کر دی ہے۔
یاد رہے کہ دو ماہ قبل پولیس تھانہ سوہاوہ نے بہترین حکمت عملی اپناتے ہوئے سائنٹیفک بنیادوں پر نوجوان کو قتل کرنے والے مرکزی ملزمان خاور اور کاظم کو گرفتار کر لیا تھا۔ گرفتار ملزمان نے اعتراف جرم بھی کر لیا تھا۔
واضح رہے کہ ملزمان خاور اور کاظم نے ملزم محمد علی کی ایماء پر ایک ماہ قبل 23 سالہ شاہزیب کو فائرنگ کر کے قتل کیا تھا۔ ملزمان اور مقتول کے مابین کبوتربازی کی وجہ سے رنجش چل رہی تھی، وقوعہ کے روز مقتول اپنے ننھیال آیا ہوا تھا۔
مقتول شاہ زیب بسلسلہ روز گار بیرون ملک مقیم تھا اور ملزمان نے مقتول کو شادی کے دس دن بعد قتل کیا تھا۔
