جہلم شہر کے گلی محلوں میں کئی ماہ سے پڑے تعمیراتی میٹریل کی وجہ سے راستے بند ہیں جس کی وجہ سے را ہگیروں کو مشکلات کا سامنا کرنا پڑ رہا ہے۔ شہریوں نے ڈپٹی کمشنر اور ایڈمنسٹریٹر میونسپل کمیٹی سے نوٹس لینے کا مطالبہ کردیا۔
تفصیلات کے مطابق جہلم شہر کے گلی محلوں اور بازاروں میں بااثر افراد نے تعمیراتی میٹریل گلیوں کے عین وسط میں پھینک رکھا ہے جس کی وجہ سے علاقہ مکین سمیت راہگیروں کو گزرنے میں شدید دشواری کا سامنا کرنا پڑرہاہے۔
شہریوں کا اس حوالے سے کہنا ہے کہ یوں لگتا ہے کہ گلیوں میں تعمیراتی میٹریل رکھنا اور مکینوں کے لئے مشکلات پیدا کرنا فیشن بن چکا ہے۔ میونسپل کمیٹی کا شعبہ انسداد تجاوزات اس حوالے مکمل لا تعلقی اختیار کئے ہوئے ہے۔
شہری تنظیموں کے عمائدین نے ڈپٹی کمشنر سیدہ رملہ علی ، ایڈمنسٹریٹر میونسپل کمیٹی اور ایڈیشنل ڈپٹی کمشنر جنرل سے نوٹس لینے اور شہر کے گلی محلوں میں موجود تعمیراتی میٹریل اٹھوانے کا مطالبہ کیاہے۔
