جہلم: ڈپٹی کمشنر جہلم میثم عباس نے ستھرا پنجاب مہم کے تحت شہر میں صفائی اور نکاسی آب کے نظام کا جائزہ لیا۔
اس موقع پر ایڈمنسٹریٹر میونسپل کمیٹی صبا سحر اور اسسٹنٹ کمشنر جہلم شمس الرحمان نے ڈی سی جہلم کو صفائی مہم اور سیوریج سسٹم کی بہتری کے اقدامات کے حوالے سے تفصیلی بریفنگ دی۔
ڈپٹی کمشنر نے سول لائن جہلم اور اسلامیہ اسکول روڈ سمیت مختلف علاقوں میں جاری نالوں کی صفائی اور نکاسی آب کے کام کا معائنہ کیا۔ اس دوران انہوں نے شہریوں کو صاف ستھرا ماحول فراہم کرنے کے لیے کیے جانے والے اقدامات کا جائزہ لیا اور صفائی عملے کو مزید بہتری کی ہدایت کی۔
ڈی سی جہلم نے واضح ہدایات جاری کرتے ہوئے کہا کہ پنجاب حکومت کا ستھرا پنجاب پروگرام ہر صورت کامیاب بنانا ہماری اولین ترجیح ہے۔ انہوں نے متعلقہ اداروں کو حکم دیا کہ نالوں پر قائم غیر قانونی تجاوزات کو فوری طور پر ہٹا کر صفائی کے عمل کو یقینی بنایا جائے۔
دورے کے دوران ڈپٹی کمشنر نے مختلف نالوں کا معائنہ کیا اور صفائی کے کام میں مزید تیزی لانے کی ہدایت دی۔ انہوں نے متعلقہ حکام کو تاکید کی کہ کچرے کو جلد از جلد ٹھکانے لگایا جائے تاکہ شہریوں کو ایک صاف ستھرا اور صحت مند ماحول فراہم کیا جا سکے۔
شہریوں نے اس اقدام کو سراہتے ہوئے امید ظاہر کی کہ جہلم شہر میں نکاسی آب کے مسائل جلد حل ہوں گے اور ستھرا پنجاب مہم کے تحت شہر کو مزید بہتر بنایا جائے گا۔
