جہلم: ڈپٹی کمشنر دفتر میں عوامی مسائل کی شنوائی کا سلسلہ روزانہ کی بنیاد پر جاری ہے۔
ڈپٹی کمشنر سید محمد میثم عباس کی سربراہی میں اوپن ڈور پالیسی کے تحت دفتر کے دروازے ضلع کے شہریوں کے لیے کھلے ہیں، جہاں وہ روزانہ مقررہ اوقات میں کھلی کچہری منعقد کر کے شہریوں کے مسائل سنتے اور ان کے فوری حل کے لیے اقدامات کرتے ہیں۔
ڈپٹی کمشنر نے واضح کیا کہ عوامی شکایات کے حل کے لیے زیرو ٹالرنس پالیسی نافذ کر دی گئی ہے، اور تمام محکموں کے افسران کو سختی سے ہدایت کی گئی ہے کہ وہ شہریوں کی خدمت کو اولین ترجیح بنائیں۔
انہوں نے مزید کہا کہ تمام چار تحصیلوں کے اسسٹنٹ کمشنرز اور محکموں کے سربراہان کو بھی ہدایت جاری کر دی گئی ہے کہ وہ مقررہ اوقات میں دفاتر میں اپنی موجودگی یقینی بنائیں اور عوام کے مسائل حل کرنے میں بھرپور کردار ادا کریں۔
شہریوں نے ڈپٹی کمشنر کی جانب سے کھلی کچہری کے انعقاد اور عوامی شکایات کے فوری ازالے کے اقدامات کو سراہا اور امید ظاہر کی کہ یہ سلسلہ مستقبل میں بھی جاری رہے گا، تاکہ عوام کے مسائل بروقت حل ہو سکیں۔
