ابوظہبی: خلیجی ملک متحدہ عرب امارات سے قتل اور اقدام قتل کے انتہائی مطلوب 9 پاکستانی پکڑے گئے۔
تفصیلات کے مطابق وفاقی تحقیقاتی ادارے ایف آئی اے نے بیرون ملک سے سنگین جرائم میں مطلوب 9 ملزمان کو گرفتار کر لیا ہے، ملزمان کئی سال سے پنجاب پولیس کو مطلوب تھے، قتل کر کے بیرون ملک فرار ہونے والے ملزمان کو یو اے ای کے مختلف علاقوں سے گرفتار کیا گیا، ملزمان کو متحدہ عرب امارات سے پاکستان منتقل کرنے کے لئے ٹیم روانہ کر دی گئی جنہیں لاہور ائرپورٹ پر پنجاب پولیس کے حوالے کیا جائے گا۔
ایف آئی اے حکام نے بتایا کہ پولیس کو مطلوب ملزمان کی گرفتاری انٹرپول اسلام آباد کی انٹرپول ابوظہبی کے ساتھ مشترکہ کارروائی کے نتیجے میں عمل میں لائی گئی، گرفتار ملزمان میں عرفان اصغر، فرحان نزاکت، ثمر عباس، نجیب اللہ، صدام حسین، محمد رفیق، محمد ثاقب، محمد عثمان اور طارق محمود شامل ہیں، ملزمان کے خلاف قتل اور اقدام قتل کی دفعات کے تحت مختلف شہروں میں مقدمات درج تھے۔
اس حوالے سے مزید یہ بھی بتایا گیا ہے کہ ملزم طارق محمود گزشتہ 14 سال سے پنجاب پولیس کو مطلوب تھا، ملزم محمد رفیق کے خلاف سال 2011ء میں مقدمہ درج ہوا، ملزم نجیب اللہ سال 2014ء اور ملزم صدام حسین سال 2018ء میں قتل کرکے بیرون ملک فرار ہوا تھا جب کہ دیگر گرفتار ملزمان کے خلاف مقدمات سال 2020ء سے 2023ء کے دوران درج کئے گئے ہیں۔
گرفتار ملزمان میں سیالکوٹ پولیس کو 3، ڈی جی خان پولیس کو 2 ملزمان مطلوب تھے، جب کہ فیصل آباد، گجرانوالہ، پاکپتن اور بھکر پولیس کو 1،1 ملزم مطلوب تھا۔
