جہلم: ملک وزیر خان نے کہا ہے کہ رمضان المبارک کے مقدس مہینے میں انسانی طبیعت نرم پڑ جاتی ہے اور انسان نیکی کی طرف زیادہ مائل ہو جاتا ہے۔ اس ماہِ مبارک میں گناہ کے مواقع نسبتاً کم جبکہ نیکی اور خیر کے مواقع زیادہ دستیاب ہوتے ہیں، جبکہ اللہ تعالیٰ کی رحمت کا سمندر پورے جوبن پر ہوتا ہے۔
جہلم کی معروف سیاسی و سماجی شخصیت الحاج ملک وزیر خان نے کہا کہ اس بابرکت مہینے میں لوگوں کو ایسے اعمال کی طرف متوجہ کرنا وقت کی اہم ضرورت ہے جو انسانی افعال و اعمال کا محور و مرکز ہیں۔ ان کا کہنا تھا کہ تزکیۂ نفس ایک نبوی فریضہ ہے، جو انسان کی باطنی تطہیر اور اخلاقی تعمیر کا بنیادی ذریعہ ہے۔ تزکیۂ نفس کے بغیر نہ کسی فرد کی انفرادی زندگی سنور سکتی ہے اور نہ ہی معاشرہ حقیقی معنوں میں امن و سکون کا گہوارہ بن سکتا ہے۔
الحاج ملک وزیر خان نے مزید کہا کہ تزکیہ نفس ایک ہمہ گیر انسانی ضرورت ہے، جو انسان کو توازن عطا کرتی ہے اور اسے اعتدال، صبر، برداشت اور اعلیٰ اخلاق کی راہ پر گامزن کرتی ہے۔ انہوں نے زور دیا کہ رمضان المبارک کو محض بھوک اور پیاس تک محدود رکھنے کے بجائے اسے کردار سازی، اخلاقی اصلاح اور روحانی بہتری کا ذریعہ بنایا جائے تاکہ فرد اور معاشرہ دونوں مثبت تبدیلی کی طرف بڑھ سکیں۔
