جہلم شہر اور گردونواح میں ملاوٹ شدہ مصالحہ جات کی کھلے عام فروخت جاری، پنجاب فوڈ اتھارٹی کے ذمہ داران خاموش تماشائی بنے ہوئے ہیں۔
تفصیلات کے مطابق سرخ مرچ، مصالحہ، ہلدی، گوشت، دودھ، دہی، دالیں، سوجی، بیسن سمیت دیگر مصالحہ جات کو خطرناک کیمیکل رنگ اور چاول کے بھوسے کی ملاوٹ کرکے بازاروں میں کھلے عام فروخت کیا جارہاہے۔
دکانداروں نے جعلی مصالحہ جات تیار کرنے کیلئے گھروں میں منی فیکٹریاں قائم کر رکھی ہیں ان غیرمعیاری مصالحہ جات کو ہوٹلز ، میرج ہالز و میرج گارڈن ، کینٹینوں سمیت شہر کے بازاروں میں کھلے عام فروخت کیا جا رہا ہے جسے صارفین خرید کر کھانوں میں استعمال کر نے پر مجبور ہیں ، جس کے استعمال سے شہریوں کی بڑی تعداد معدے کی خطرناک بیماریوں میں مبتلا ہو رہے ہیں۔
شہریوں نے ڈی جی پنجاب فوڈ اتھارٹی اور ایڈوائزرصوبائی محتسب پنجاب سے مطالبہ کیا ہے کہ شہر سمیت ضلع بھر میں ناقص و مضر صحت مصالحہ جات تیار و فروخت کرنے والے دکانداروں کے خلاف کارروائیاں عمل میں میں لائی جائیں تاکہ شہری بیماریوں سے محفوظ رہ سکیں۔
