سوہاوہ/ چکوال: دارالعرفان منارہ ضلع چکوال میں واقع سلسلہ عالیہ نقشبندیہ اویسیہ کا روحانی مرکز، ایک بار پھر اپنے سالانہ 40 روزہ روحانی تربیتی اجتماع کی میزبانی کے لیے تیار ہے۔ یہ عظیم الشان اجتماع 14 جون تا 20 جولائی 2025 کو شیخ المکرم امیر عبدالقدیر اعوان کی زیر سرپرستی منعقد ہو رہا ہے۔
کلر کہار انٹرچینج سے صرف 20 کلومیٹر جنوب میں واقع دارالعرفان منارہ ان افراد کے لیے روحانی پناہ گاہ کی حیثیت رکھتا ہے جو دنیوی انتشار، نفس و شیطان کے فتنوں سے بچ کر اپنی باطنی اصلاح اور حقیقی مقصدِ حیات کو پانے کے خواہاں ہیں۔
یہ اجتماع محض ایک رسمی یا ظاہری پروگرام نہیں بلکہ روحانی تربیت، اصلاحِ باطن، اور معرفتِ الٰہی کے سفر کا ایک نایاب موقع ہے۔ روزانہ ہزاروں افراد یہاں شریک ہو کر صوفیاء کرام کی صحبت سے فیض حاصل کرتے ہیں۔ بقول شیخ المکرم مدظلہ العالی:
"یک زمانہ صحبت با اولیاء، بہتر از صد سالہ طاعت بے ریاء”
اجتماع میں روزانہ تربیتی کلاسز، ذکر و فکر کی محافل، اور حضرت شیخ المکرم کے پُرتاثیر خطابات شامل ہوتے ہیں جو شرکت کرنے والے افراد کی زندگیوں میں حقیقی تبدیلی کا ذریعہ بنتے ہیں۔
امیر عبدالقدیر اعوان اپنے خطابات میں انسان کی حقیقت کو واضح کرتے ہیں کہ انسان بدن اور روح کا مجموعہ ہے، جن کی ضروریات الگ الگ ہیں۔ جسم مٹی سے بنا ہے، اس کی غذا بھی مٹی سے حاصل ہوتی ہے جبکہ روحانی غذا اللہ کے کلام، ذکر، درود، نماز اور روزے سے حاصل ہوتی ہے۔
انسان کو برائی کی طرف مائل کرنے والا نفس اور شیطان ہمیشہ متحرک رہتے ہیں، اور ان کے شر سے بچنے کا واحد ذریعہ کتاب اللہ اور سنتِ رسول ﷺ سے مضبوط تعلق ہے۔ قرآن کریم میں دلوں پر زنگ چڑھنے کا ذکر ہے اور اس زنگ کو اتارنے کا نسخہ نبی کریم ﷺ نے ذکرِ الٰہی کو قرار دیا ہے۔
دارالعرفان منارہ اسی روحانی صفائی اور باطنی تربیت کی عظیم درسگاہ ہے جہاں دنیا بھر سے آنے والے سالکین نہ صرف علم حاصل کرتے ہیں بلکہ عمل اور حقیقت کی راہوں پر بھی گامزن ہوتے ہیں۔
اجتماع کے دوران:
- روحانی کلاسز کا روزانہ انعقاد
- حضرت شیخ کی صحبت میں وقت گزارنے کا موقع
- باقاعدہ ذکر کی محافل
- دینی و روحانی سوالات کے جوابات
یہ اجتماع ان افراد کے لیے ایک نعمتِ عظمیٰ ہے جو زندگی کو محض ظاہری کامیابی کے بجائے باطنی سکون اور قربِ الٰہی کے ساتھ گزارنا چاہتے ہیں۔
آئیں، اور اس عظیم روحانی اجتماع کا حصہ بن کر اپنی زندگی کو ایک نئے شعور، نئی معنویت اور حقیقی مقصد کے ساتھ ہم آہنگ کیجیے۔
دعوت عام ہے، صدائے بلند ہے — یہ وقت کی سب سے قیمتی سرمایہ کاری ہو سکتی ہے!
