پنڈدادنخان: تحصیل ہیڈکوارٹر ہسپتال پنڈدادنخان میں عید میلاد النبی ﷺ کے بابرکت موقع پر "میلادِ مصطفیٰ ﷺ” کی پرنور محفل کا انعقاد کیا گیا۔
اس روح پرور تقریب میں میڈیکل سپرنٹنڈنٹ ڈاکٹر محمد عون، ڈاکٹر محمد آصف سرجن، ڈاکٹر محمد ضیا، ڈاکٹر انعام جمالی، ہسپتال عملہ، سول سوسائٹی، تاجر برادری اور صحافیوں کی بڑی تعداد نے شرکت کی۔
تقریب کا آغاز تلاوتِ کلامِ پاک سے ہوا جس کے بعد ثناء خواں حضرات نے آقائے دو جہاں حضرت محمد مصطفیٰ ﷺ کی بارگاہ میں عقیدت کے پھول نچھاور کیے۔
مقررین نے اپنے خطابات میں نبی کریم ﷺ کی سیرتِ طیبہ اور اخلاقِ حسنہ پر تفصیلی روشنی ڈالی۔ انہوں نے کہا کہ حضور ﷺ کی تعلیمات پوری انسانیت کے لیے مشعلِ راہ ہیں اور ہمیں چاہیے کہ آپ ﷺ کے اخلاق، ہمدردی، بھائی چارے اور افہام و تفہیم کے پیغام کو اپنی زندگیوں میں اپنائیں۔
اس موقع پر ایم ایس ڈاکٹر محمد عون نے پروگرام کے تمام شرکاء کا شکریہ ادا کیا اور کہا کہ نبی کریم ﷺ کی سیرت پر عمل ہی ہماری انفرادی و اجتماعی کامیابی کی ضمانت ہے۔
تقریب کے اختتام پر ملک و قوم کی سلامتی، امن و امان اور مریضوں کی جلد صحت یابی کے لیے خصوصی دعا کی گئی۔
