جہلم: محکمہ بہبود آبادی پنجاب کی ہدایت پر تحصیل سوہاوہ ضلع جہلم میں ویلیج تھیٹر/اصلاحی پتلی تماشا کا انعقاد اے ڈی پی سکیم ایڈووکیسی کمپین کے تحت کیا گیا۔
حسن خالد وڑائچ ڈسٹرکٹ پاپولیشن ویلفیئر آفیسر جہلم نے شرکا سے گفتگو کرتے ہوئے کہا کہ محکمہ بہبود آبادی پنجاب اور رفیع پیر تھیٹر کے اشتراک سے ضلع جہلم میں پنڈ دادنخان، دینہ اور سوہاوہ میں اصلاحی پتلی تماشا کے سلسلہ میں آخری پروگرام گورنمنٹ حسنات شہید ہائی سکول سوہاوہ میں کیا گیا۔
اصلاحی پتلی تماشا کے ذریعے خاندان کو درپیش مسائل جن میں ماں بچے کی صحت،بیٹیوں کی تعلیم اور صحت کی اہمیت،وسائل اور ضروریات میں عدم توازن، صنفی امتیاز اور فیصلہ سازی میں خواتین کی عدم شرکت جیسے موضوعات کو نہایت ہی خوبصورت اور دلکش انداز میں پیش کرنے پرفیع پیر تھیٹر کی ٹیم کو خراج تحسین پیش کیا۔
مہمان خصوصی محمد افضل ڈپٹی ڈائریکٹر پاپولیشن ویلفیئر ڈیپارٹمنٹ پنجاب نے اصلاحی پتلی تماشا کے لئے محکمہ بہبود آبادی پنجاب اور رفیع پیر تھیٹر کے اشتراک کو سراہا اور امید ظاہر کی کہ یہ کوشش تفریحی ابلاغ کے ذریعے معاشرے میں ماں بچے کی صحت کے حوالے سے صحت مند تبدیلی اور پائیدار ترقی کے حصول کا پیش خیمہ ثابت ہوگی۔
طارق شفیع پرنسپل گورنمنٹ حسنات شہید ہائی سکول سوہاوہ نے محکمہ بہبود آبادی پنجاب اور رفیع پیر تھیٹر کی کاوش کو سراہا اور کہا کہ اس پتلی تماشا سے طلباء کو خاندان اور معاشرتی مسائل بارے جو آگاہی حاصل ہوئی ہے وہ ان کی آئندہ عملی زندگی میں فیصلہ سازی کے لیے معاون ثابت ہو گی۔
