جہلم: عیدالفطر قریب آتے ہی بازاروں میں خریداروں کا رش بڑھنے لگا جبکہ کپڑوں، جوتوں، جیولری، چوڑیوں اور دیگر اشیاء کی قیمتوں میں ہوشربا اضافہ دیکھنے میں آ رہا ہے، جس کے باعث شہری شدید پریشانی کا شکار ہیں۔
تفصیلات کے مطابق، جیسے جیسے عید قریب آرہی ہے، جہلم اور گردونواح کے شہری خریداری کے لیے بازاروں اور مارکیٹوں کا رخ کر رہے ہیں۔ تاہم دکانداروں کی جانب سے اشیاء کی منہ مانگی قیمتیں وصول کرنے کی شکایات سامنے آ رہی ہیں۔
اس سے غریب اور متوسط طبقے کے افراد مشکلات کا شکار ہو گئے ہیں۔ بڑھتی ہوئی مہنگائی کے سبب کئی شہری بغیر خریداری کے خالی ہاتھ گھروں کو لوٹنے پر مجبور ہیں۔
خریداروں نے ضلعی انتظامیہ سے مطالبہ کیا ہے کہ قیمتوں کو کنٹرول کرنے کے لیے فوری اقدامات کیے جائیں تاکہ عام شہری بھی عید کی خوشیوں میں شریک ہو سکیں۔
