پنڈدادنخان: تھانہ پنڈدادنخان پولیس نے ایس ایچ او کی قیادت میں قماربازی کے خلاف بڑی کارروائی کرتے ہوئے آٹھ ملزمان کو گرفتار کر لیا۔
پولیس نے کارروائی کے دوران ملزمان کے قبضے سے نقدی، قیمتی موبائل فونز، طلائی و چاندی کے زیورات، غیر ملکی کرنسی اور قماربازی میں استعمال ہونے والا دیگر سامان برآمد کر لیا۔
پولیس ذرائع کے مطابق گرفتار ہونے والے ملزمان میں محمد اشفاق، محمد زبیر، ابوبکر، ذیشان، محسن، بابر عباس، اظہر عباس اور عبدالرحمن شامل ہیں، جو سنوکر گیم کی آڑ میں قماربازی میں ملوث پائے گئے۔
پولیس نے چھاپہ مار کارروائی کے دوران داؤ پر لگی رقم 16 ہزار 90 روپے، نو عدد قیمتی موبائل فون جن کی مجموعی مالیت ایک لاکھ اسی ہزار روپے بتائی جا رہی ہے، طلائی زیورات جن میں انگوٹھی اور بریسلٹ شامل ہیں جن کی مالیت ایک لاکھ پچاس ہزار روپے، چاندی کا بریسلٹ جس کی قیمت تقریباً پانچ ہزار روپے ہے اور مختلف ممالک کی غیر ملکی کرنسی جن میں ملائیشیا کی 10 رنگٹ، برطانیہ کے 5 پاؤنڈ، مالدیپ کے 5 روپے اور ایک کویتی دینار شامل ہیں، قبضے میں لے لی گئی۔
پولیس کا کہنا ہے کہ قماربازی میں استعمال ہونے والے آلات بھی موقع سے برآمد کر لیے گئے ہیں اور جوئے کا مجموعی تخمینہ تقریباً تین لاکھ اکاون ہزار نوے روپے لگایا گیا ہے۔ تمام ملزمان کے خلاف انسدادِ قماربازی ایکٹ کے تحت مقدمہ درج کر لیا گیا ہے اور مزید تفتیش جاری ہے۔
تھانہ پنڈدادنخان کے ایس ایچ او نے اس کارروائی کو علاقے میں بڑھتی ہوئی غیر قانونی سرگرمیوں کے خلاف ایک مؤثر قدم قرار دیتے ہوئے کہا کہ معاشرتی برائیوں کے خاتمے کے لیے ایسی کارروائیاں مستقبل میں بھی جاری رہیں گی۔
