پنڈدادنخان: گورنمنٹ الیبرونی ڈگری کالج پنڈدادنخان کے نئے پرنسپل پروفیسر نیاز اعوان کے اعزاز میں ایک پروقار تقریب کا انعقاد رائل میرج ہال پنڈدادنخان میں کیا گیا۔
اس تقریب کا اہتمام مرکزی انجمن تاجران پنڈدادنخان، سٹی ویلفیئر کونسل رجسٹرڈ، سالٹ رینج میڈیا کلب رجسٹرڈ اور تحصیل پریس کلب رجسٹرڈ پنڈدادنخان نے مشترکہ طور پر کیا۔ تقریب میں وکلاء، تاجر برادری، صحافیوں، سماجی و رفاعی تنظیموں کے نمائندگان اور مختلف شعبہ ہائے زندگی سے تعلق رکھنے والی شخصیات نے بڑی تعداد میں شرکت کی۔
مرکزی انجمن تاجران کے صدر چوہدری زبیر جمیل نے خطاب کرتے ہوئے کہا کہ گورنمنٹ الیبرونی ڈگری کالج پنڈدادنخان ایک تاریخی علمی درسگاہ ہے اور ہمیں امید ہے کہ پروفیسر نیاز اعوان اپنی قابلیت اور تجربے سے تحصیل میں تعلیمی معیار کو مزید بلند کریں گے۔
پرنسپل پروفیسر نیاز اعوان نے اپنے خطاب میں کہا کہ انہیں ایک تاریخی ادارے کی قیادت کی ذمہ داری سونپی گئی ہے جو ان کے لیے باعث فخر ہے۔ انہوں نے اس عزم کا اظہار کیا کہ وہ اپنی تمام تر صلاحیتیں فروغِ تعلیم کے لیے وقف کریں گے۔ انہوں نے مزید کہا کہ کالج کا عملہ اعلیٰ تعلیم یافتہ اور محنتی ہے جو طلبہ کی بہترین تعلیم و تربیت کے لیے کوشاں ہے۔
تقریب میں آمد پر مہمانوں کا شاندار استقبال کیا گیا۔ چوہدری زبیر جمیل، چوہدری حاجی اشفاق (صدر سٹی ویلفیئر کونسل)، طاہر اقبال ایڈووکیٹ، استاد جلیل، حافظ عبدالوحید چوہدری، عمران نواب، راجہ مدثر حیات مٹھو، چوہدری انتظار الحق، ڈاکٹر عبدالصمد، حاجی بلال اشرفی، محمد ابوبکر، چوہدری طارق عزیز اور ملک غلام مصطفیٰ مٹھو نے پروفیسر نیاز اعوان کا استقبال کیا۔
تقریب میں مختلف تنظیموں کے نمائندوں کی جانب سے پروفیسر نیاز اعوان کو گلدستے پیش کیے گئے۔ ان میں چوہدری سلیم باگڑی (صدر سالٹ رینج میڈیا کلب)، راجہ ملازم حسین طاہر (چیف آرگنائزر تحصیل پریس کلب)، حافظ طاہر ارشاد (چیئرمین)، محمد وسیم وصی (سیکرٹری اطلاعات) اور عابد قریشی (نائب صدر) شامل تھے۔
آخر میں کنوینئر مرکزی ورکنگ کمیٹی مفتی بشیر احمد کرم نے خصوصی دعا کرائی جبکہ مہمانوں کی تواضع ہائی ٹی سے کی گئی۔
