جہلم: ڈپٹی کمشنر جہلم میر رضا اوزگن نے کہا ہے کہ جلالپور کندوال نہر کی تکمیل میں حائل تمام رکاوٹوں کو ترجیحی بنیادوں پر دور کرکے منصوبے کو چند ماہ کے اندر باقاعدہ فعال کر دیا جائے گا۔
ڈپٹی کمشنر جہلم نے جلالپور کندوال نہر کے پیش رفت اجلاس کی صدارت کی، جس میں اسسٹنٹ کمشنر پنڈ دادن خان، ماہرینِ آبپاشی اور منصوبے کی تکنیکی ٹیم کے اہم نمائندگان نے شرکت کی۔ اجلاس میں منصوبے پر جاری کام کی پیش رفت کا تفصیلی جائزہ لیا گیا اور درپیش انتظامی و فنی مسائل پر غور کیا گیا۔
میر رضا اوزگن نے متعلقہ حکام کو ہدایت کی کہ منصوبے کے تمام تعمیراتی اور فنی کام مقررہ مدت کے اندر مکمل کیے جائیں اور تکمیل کی راہ میں حائل رکاوٹوں کو ترجیحی بنیادوں پر دور کیا جائے۔ انہوں نے کام کی رفتار کے ساتھ معیار کو برقرار رکھنے اور مقررہ اہداف کے مطابق پیش رفت یقینی بنانے پر بھی زور دیا۔
ڈپٹی کمشنر نے کہا کہ جلالپور کندوال نہر کی فعال سازی سے پنڈدادنخان اور ملحقہ علاقوں میں زرعی سرگرمیوں کو فروغ ملے گا۔ منصوبے کی تکمیل سے ہزاروں ایکڑ بنجر اراضی کو سیراب کرنے میں مدد ملے گی، جس کے نتیجے میں مقامی کسانوں کی معاشی صورتحال میں بہتری اور علاقے میں زرعی پیداوار میں اضافے کے امکانات پیدا ہوں گے۔
اجلاس کے دوران پراجیکٹ ٹیم اور آبپاشی ماہرین نے منصوبے کی موجودہ صورتحال، مکمل کیے گئے کام اور باقی ماندہ امور کے حوالے سے ڈپٹی کمشنر کو تفصیلی بریفنگ دی۔ ڈپٹی کمشنر نے منصوبے پر جاری پیش رفت کا جائزہ لیتے ہوئے متعلقہ حکام کو ہدایت کی کہ باقی کاموں کی تکمیل میں وقت کی پابندی کو ہر صورت یقینی بنایا جائے۔
انہوں نے واضح کیا کہ جلالپور ایریگیشن پراجیکٹ کی بروقت تکمیل کے لیے تمام متعلقہ محکمے باہمی رابطے کے ساتھ کام کریں تاکہ منصوبے کو مقررہ مدت میں فعال کرنے کا ہدف حاصل کیا جا سکے۔
