جہلم شہر کے گنجان آباد علاقے بورڈنگ محلہ میں قائم گورنمنٹ پرائمری سکول کی خستہ حال عمارت اور طلبہ کے کھلے آسمان تلے تعلیم حاصل کرنے کی خبر پر ڈپٹی کمشنر جہلم میثم عباس نے فوری نوٹس لیتے ہوئے سکول کا دورہ کیا۔ عمارت کی مرمت اور سیوریج کی صفائی کے احکامات جاری کئے۔
تفصیلات کے مطابق جہلم میں گورنمنٹ پرائمری سکول بورڈنگ محلہ کی عمارت (جو قیام پاکستان سے قبل تعمیر کی گئی تھی) خستہ حالی کے باعث خطرناک قرار دی جا چکی ہے۔ والدین کی شکایات اور میڈیا پر خبروں کے بعد ڈپٹی کمشنر نے صبح سویرے سکول کا دورہ کیا اور صورتحال کا جائزہ لیا۔
اس موقع پر ان کے ہمراہ ڈپٹی ڈائریکٹر ڈویلپمنٹ اشتیاق احمد، ایکسین بلڈنگ، سب انجینئر، سی ای او ایجوکیشن سلیم شاہ اور دیگر متعلقہ افسران موجود تھے۔
ڈپٹی کمشنر میثم عباس نے سکول کی خستہ حال عمارت کا معائنہ کرتے ہوئے محکمہ تعلیم اور بلڈنگ کے حکام کو فوری طور پر چھتوں اور دیواروں کی مرمت کے احکامات جاری کیے اور ہدایت کی کہ عمارت کی بحالی کا کام جلد از جلد مکمل کیا جائے۔ اس کے علاوہ انہوں نے میونسپل کمیٹی کے حکام کو سکول کے باہر موجود مرکزی سیوریج نالے کی فوری صفائی اور اسے ڈھانپنے کے اقدامات کرنے کا حکم دیا۔
ڈپٹی کمشنر نے کہا کہ سکولوں میں بنیادی سہولیات کی فراہمی پر کوئی سمجھوتہ نہیں کیا جائے گا۔ بچوں کے لیے محفوظ اور بہترین تعلیمی ماحول فراہم کرنا ضلعی انتظامیہ کی اولین ترجیح ہے۔ انہوں نے متعلقہ محکموں کو ہدایت دی کہ وہ اپنی ذمہ داریوں کو مؤثر انداز میں انجام دیں تاکہ طلبہ کو تعلیم کے حصول میں کسی قسم کی دشواری کا سامنا نہ کرنا پڑے۔
والدین اور شہریوں نے ڈپٹی کمشنر کے اس فوری ایکشن کو سراہا اور امید ظاہر کی کہ سکول کی عمارت جلد بہتر حالت میں بحال کر دی جائے گی۔
