جہلم: ریجنل پولیس آفیسر راولپنڈی ریجن بابر سرفراز الپا نے ضلع جہلم کا دورہ کیا۔
آر پی او راولپنڈی کی زیر صدارت دفتر پولیس جہلم میں کرائم میٹنگ کاانعقاد کیا گیا، میٹنگ میں ڈی پی او جہلم، ایس پی انویسٹی گیشن،جملہ ڈی ایس پیز اور ایس ایچ اوز ضلع ہذا نے شرکت کی۔
میٹنگ میں ڈی پی او جہلم ناصر محمود باجوہ نے ضلع کے کرائم کی مجموعی صورتحال سے متعلق بریفنگ دی۔
آر پی او بابر سرفراز الپا نے کہا کہ ایس ڈی پی اوز اور ایس ایچ اوز خصوصی دلچسپی لیتے ہوئےتفتیش کو خود سپروائز کریں،ناقص تفتیش پر باز پُرس ہو گی۔ حکومت پنجاب کی ہدایات پر جاری کردہ خصوصی مہمات برخلاف اشتہاری ملزمان،منشیات فروشوں کے خلاف ایکشن اور پتنگ بازی کے انسداد کے لیے موثر کریک ڈاؤن کریں۔
انہوں نے کہا کہ تمام افسران اپنی ماتحت پولیس فورس کی ویلفیئر کے لیے ہر ممکن اقدامات عمل میں لائیں،پولیس افسران کا طرزعمل ماتحتان کے ساتھ فیملی ممبر کی طرح ہونا چاہیے۔ پولیس افسران دفاتر اور تھانہ جات میں عوام کے ساتھ خوش اخلاقی اور خندہ پیشانی سے پیش آئیں ،اختیارات سے تجاوز اور عوام الناس سے بدتمیزی سے پیش آنے والے افسران سے کوئی رعایت نہیں برتی جائے گی۔
آر پی او راولپنڈی ڈویژن بابر سرفراز الپا نے کہا کہ شہریوں کو انصاف کی فراہمی،میرٹ پر تفتیش، مقدمات کی بروقت یکسوئی اور پبلک سروس ڈیلیوری کے اعلی معیار سے ہی جہلم پولیس ایک بہترین پولیس کہلانے کے لائق ہو سکتی ہے۔
