بارسلونا: ہوپ آف اوورسیز پاکستانیز کے چیئرمین مہران تارڑ، صدر شیخ سعید، ایگزیکٹو ممبران، بورڈ ممبران، اسپین ٹیم اور ہوپ کے ہر ممبر کی محنت و کوشش سے بارسلونا میں اوورسیز کنونشن کا انعقاد کیا گیا جس میں سر پرست ہوپ آف پاکستانیز اوورسیز ساجد تارڑ نے خصوصی شرکت کی۔
ساجد تارڑ اور قونصل جنرل بارسلونا مراد علی وزیر کے ہال میں پہنچنے پر ان کا استقبال کیا گیا۔ کنونشن کا آغاز تلاوت قرآن مجید اور نعت رسول مقبول ﷺ سے ہوا جس کی سعادت قاری عبدالرحمٰن اور قدیر اے خان نے حاصل کی۔
پاکستان کا قومی ترانہ قونصل جنرل مراد علی وزیر اور ہال میں موجود تمام افراد نے مل کر پڑھا۔ کنونشن میں پاکستانی کمیونٹی نے بھی شرکت کی اور اس امید کا اظہار کیا کہ ہمارے مسائل حل ہوں گے، شرکاء نے پاکستان زندہ باد کے نعرے بھی لگائے۔
چوہدری محمد جعفر، چوہدری ساجد گوندل، چوہدری مہران تارڑ اور دیگرنے خطاب میں کمیونٹی کو یقین دہانی کرائی کہ اس فورم کا سیاست سے کوئی تعلق نہیں ہوگا، یہ خالصتاً فلاحی کاموں اور مسائل میں جکڑے اوورسیز کی آواز بنے گا۔
مقررین نے کہا کہ جب ہمیں اس فورم پر سیاست کی بھنک پڑی تو اہم اس سے الگ ہو جائیں گے۔ ساجد تارڑ کی اوورسیز پاکستانیوں کے لئے خدمات کو بھی خراج تحسین پیش کیا گیا۔
قونصل جنرل مراد علی وزیر نے خطاب میں کہا کہ منڈی بہاؤالدین کے لوگ ملنسار، خدمت گزار اور انسانیت کیلئے کام کرنے والے ہیں۔ میت پاکستان بھیجنے کے حوالے سے جو بات اس فورم سے ہوئی ہے میں کہوں گا کہ یہاں بہت ساری ایسوسی ایشنز ہیں جو یہ کام کر رہی ہیں آپ لوگوں کو چاہئے کہ ان میں سے کسی کا بھی حصہ بن جائیں۔
انہوں نے کہا کہ ہمارے پاس اتنے فنڈز نہیں کہ اس وزن کو برداشت کر سکیں، ہم ان سماجی کام کرنے والوں کی طرف دیکھتے ہیں اور ان کی مدد سے میت کو پاکستان بھجواتے ہیں۔ ساجد تارڑ نے کہا کہ میں جب بھی بارسلونا آیا ہوں ڈھیروں محبتیں ملی ہیں، میں ان کا مقروض ہوں۔
انہوں نے کہا کہ مجھے خوشی ہوئی کہ ہم نے خود اپنا ترانہ پڑھا ہے مجھے امید ہے کہ آئندہ آپ اسپین کا قومی ترانہ بھی پڑھیں گے، آج میں آپ کو اپنی 35سال تارک وطن والی زندگی کا تجربہ بتاتا ہوں کہ آپ اس وقت تک کامیاب ہو ہی نہیں سکتے جب تک آپ جہاں سے رزق کماتے ہیں اس مٹی سے محبت نہ کریں، جب تک آپ اس ملک سے مخلص نہیں ہوں گے آپ کامیاب نہیں ہوں گے، آپ یہاں مضبوط ہوں گے تو پاکستان میں آپ کے مسائل حل ہوں گے۔
انہوں نے کہا کہ میری ساری زندگی سیاست میں گزری ہے میں آپ لوگوں سے کہنا چاہتا ہوں کہ سیاست کریں لیکن پاکستان میں نہیں یہاں اسپین کی سیاست کا حصہ بنیں اور میں اسی پیغام کو آگے بڑھانا چاہتا ہوں اور میں چاہتا ہوں کہ اب جب اسپین میں انتخابات ہوں تو آپ لوگ مل کر اپنا ایک نمائندہ ضرور کھڑا کریں اور میں آپ لوگوں کی انتخابی مہم چلانے کے لئے یہاں آؤں۔
انہوں نے کہا کہ ہوپ بنانے کا مقصد یہ ہے کہ بہت ساری آرگنائزیشز موجود ہیں اور وہ کام بھی کر رہی ہیں لیکن ہم وہ کام کریں گے جو یہ تنظیمات نہیں کر رہیں، ڈنکی لگا کر آنے والے لوگوں کے مسائل کو حل کریں گے جس پر آج تک کسی نے توجہ نہیں دی، آپس میں بھائی چارہ قائم کریں جو وقت کی سب سے اہم ضرورت ہے اور یہ ثواب کا بھی کام ہے۔
ساتھیوں نے کہا کہ سیاست ہوئی تو چھوڑ جائیں گے میں کہتا ہوں کہ اگر سیاست ہوئی تو میں خود سب سے پہلے اس پلیٹ فارم کو چھوڑ دوں گا۔
