جہلم: ڈسٹرکٹ ایمرجنسی آفیسر ریسکیو 1122 جہلم انجینئر سعید احمد کی زیرِ صدارت اجلاس منعقد ہوا، جس میں ریسکیو 1122 جہلم کی ماہ ستمبر 2026 کی کارکردگی کا تفصیلی جائزہ لیا گیا۔
اجلاس میں بتایا گیا کہ ریسکیو 1122 جہلم نے ماہ ستمبر کے دوران بروقت رسپانس کرتے ہوئے مجموعی طور پر 3173 افراد کو ریسکیو کیا۔
کارکردگی رپورٹ کے مطابق ریسکیو 1122 کے اہلکاروں نے 1363 مریضوں کو موقع پر ابتدائی طبی امداد فراہم کی، جبکہ فوری طبی امداد کے بعد 1726 مریضوں کو ہسپتال منتقل کیا گیا۔
رپورٹ کے مطابق ریسکیو 1122 جہلم نے ستمبر کے دوران مجموعی طور پر 3263 ایمرجنسی کالز پر رسپانس کیا۔ ان میں 404 روڈ ٹریفک حادثات، 2354 میڈیکل ایمرجنسیز، 17 آتشزدگی کے واقعات، 34 کرائم ایمرجنسیز، ایک ڈوبنے کا واقعہ اور 453 متفرق ایمرجنسیز شامل تھیں۔
ریسکیو 1122 جہلم نے ماہ ستمبر کے دوران بھی بہتر رسپانس ٹائم کی روایت برقرار رکھی اور اوسطاً 7.9 منٹ کے رسپانس ٹائم میں متاثرہ افراد تک پہنچ کر ریسکیو سروسز فراہم کیں۔
کمیونٹی سیفٹی پروگرام کے تحت محفوظ معاشرے کے قیام کے لیے ریسکیو 1122 جہلم کی جانب سے ماہ ستمبر کے دوران ہائی رائز بلڈنگز کے فائر سیفٹی سروے بھی کیے گئے۔ اس کے علاوہ مختلف اداروں میں فرسٹ ایڈ اور فائر سیفٹی کے حوالے سے تربیتی پروگرامز کا انعقاد کیا گیا، جن میں متعلقہ افراد کو ہنگامی حالات سے نمٹنے اور حفاظتی اقدامات کے بارے میں عملی تربیت فراہم کی گئی۔
ریسکیو 1122 جہلم کی جانب سے ستمبر کے دوران مختلف ہسپتالوں میں فائر سیفٹی ڈرلز کا بھی انعقاد کیا گیا۔ ان مشقوں کا مقصد ہسپتال انتظامیہ اور عملے کو آگ لگنے یا کسی بھی ہنگامی صورتحال کے دوران فوری، مؤثر اور منظم حفاظتی اقدامات، فائر فائٹنگ اور ایمرجنسی رسپانس کے حوالے سے عملی تربیت فراہم کرنا تھا تاکہ کسی بھی ناگہانی صورتحال میں بروقت اور مؤثر کارروائی یقینی بنائی جا سکے۔
علاوہ ازیں پیشنٹ ٹرانسفر سروس کے تحت مریضوں کو بہتر طبی سہولیات کی فراہمی کے لیے ضلع جہلم سے مجموعی طور پر 144 مریضوں کو راولپنڈی، اسلام آباد اور سرگودھا کے ہسپتالوں میں منتقل کیا گیا۔
ڈسٹرکٹ ایمرجنسی آفیسر ریسکیو 1122 جہلم انجینئر سعید احمد نے ماہ ستمبر کے دوران ریسکیورز کی کارکردگی کو حوصلہ افزا قرار دیتے ہوئے کہا کہ ریسکیو 1122 جہلم کی ٹیم ہر وقت قدرتی آفات اور ہنگامی صورتحال سے نبرد آزما ہونے کے لیے تیار ہے۔ انہوں نے کہا کہ ریسکیو اہلکار کسی بھی ناگہانی صورتحال میں شہریوں کو بروقت اور بہترین انداز میں سروسز فراہم کرنے کے لیے اپنی ذمہ داریاں پوری کر رہے ہیں۔
