دینہ: تھانہ منگلا کینٹ پولیس نے جرائم پیشہ عناصر اور امن عامہ میں خلل ڈالنے والوں کے خلاف کارروائی کرتے ہوئے لیٹ نائٹ آوارہ گردی میں ملوث 3 افراد کو گرفتار کر لیا، جبکہ ان کے زیر استعمال بغیر نمبر پلیٹ گاڑی بھی قبضہ پولیس میں لے لی گئی۔
ترجمان جہلم پولیس کے مطابق ڈی پی او جہلم شفیق احمد چوہدری کی ہدایات پر ضلع بھر میں جرائم پیشہ عناصر اور مشتبہ سرگرمیوں میں ملوث افراد کے خلاف کارروائیوں کا سلسلہ جاری ہے۔ اسی سلسلے میں جہلم کی تحصیل دینہ میں ایس ایچ او تھانہ منگلا کینٹ اور ان کی ٹیم نے کارروائی کرتے ہوئے رات گئے مشتبہ انداز میں گھومنے پھرنے والے 3 ملزمان کو گرفتار کیا۔
پولیس کے مطابق گرفتار ملزمان عوامی مقامات پر بغیر کسی معقول وجہ کے موجود تھے اور مشتبہ سرگرمیوں میں مصروف پائے گئے۔ کارروائی کے دوران ملزمان کے زیر استعمال ایک بغیر نمبر پلیٹ گاڑی بھی تحویل میں لے لی گئی۔
پولیس حکام کا کہنا ہے کہ شہریوں کے جان و مال کے تحفظ، امن و امان کے قیام اور جرائم کی روک تھام کے لیے تمام ممکنہ اقدامات کیے جا رہے ہیں۔ عوامی مقامات پر ہلڑ بازی، آوارہ گردی اور امن عامہ میں خلل ڈالنے والے عناصر کے خلاف بلاامتیاز کارروائیاں جاری رکھی جائیں گی۔
ڈی پی او جہلم شفیق احمد چوہدری نے کہا ہے کہ قانون کی پاسداری اور شہریوں کے تحفظ کو یقینی بنانے کے لیے پولیس متحرک ہے اور مشتبہ سرگرمیوں میں ملوث عناصر کے خلاف سخت قانونی کارروائی عمل میں لائی جائے گی۔
