جہلم: پولیس نے کارروائی کرتے ہوئے چوری کی وارداتوں میں ملوث رجو گینگ کے دو خواتین سمیت چار ملزمان کو گرفتار کر لیا جبکہ ان کے قبضے سے چوری شدہ زیورات، نقدی اور ناجائز اسلحہ بھی برآمد کر لیا گیا۔
تفصیلات کے مطابق جہلم میں ایس ایچ او تھانہ سول لائنز محمد عمران اور ان کی ٹیم نے کارروائی کرتے ہوئے رجو چور گینگ کے دو خواتین سمیت چار ملزمان کو گرفتار کیا۔ پولیس کے مطابق ملزمان کے قبضے سے چوری شدہ طلائی زیورات وزنی ڈیڑھ تولہ، 17 ہزار روپے نقدی اور ناجائز اسلحہ پستول 30 بور معہ ایمونیشن برآمد کر لیا گیا ہے۔
پولیس کا کہنا ہے کہ ملزمان کے خلاف مقدمہ درج کر کے مزید تفتیش شروع کر دی گئی ہے۔
ڈسٹرکٹ پولیس آفیسر جہلم شفیق احمد چوہدری نے کہا ہے کہ جہلم پولیس شہریوں کے جان و مال کے تحفظ کے لیے ہمہ وقت کوشاں ہے اور سنگین نوعیت کے مقدمات میں ملوث ملزمان کسی رعایت کے مستحق نہیں۔
