جہلم میں عدالت نے قتل کے مقدمات میں ملوث دو مجرمان کو جرم ثابت ہونے پر عمر قید اور جرمانے کی سزا سنا دی۔
تفصیلات کے مطابق جہلم کی تحصیل پنڈدادنخان اور سوہاوہ میں دو مختلف قتل کے مقدمات میں عدالتوں نے اہم فیصلے سناتے ہوئے دو مجرمان کو عمر قید اور بھاری مالی جرمانوں کی سزائیں سنادیں۔ دونوں مقدمات میں جہلم پولیس کی بہترین تفتیش، ٹھوس شواہد اور مؤثر عدالتی پیروی فیصلہ کن ثابت ہوئی۔
تحصیل پنڈدادنخان میں قتل کے مقدمہ نمبر 98/23 بجرم 302/324/109/337(A-ii)/337(L-ii)/337(v-i)/148/149 تھانہ جلالپور شریف میں عدالت نے مرکزی مجرم حمزہ ناز کو جرم ثابت ہونے پر سزاۓ عمر قید اور دو لاکھ روپے جرمانہ کی سزا سنائی۔ مزید برآں 337-Fvi میں اسے سات سال قید اور ڈیڑھ لاکھ روپے جرمانے کی سزا بھی سنائی گئی۔
مجرم نے سال 2023 میں قتل کا ارتکاب کیا تھا۔ مقدمے کی تفتیش کے دوران جہلم پولیس نے نہ صرف ملزم کو ٹریس کر کے گرفتار کیا بلکہ ٹھوس شواہد کے ساتھ چالان عدالت کیا، جس کے بعد عدالت نے جرم ثابت ہونے پر سزا سنائی۔
ادھر جہلم کی تحصیل سوہاوہ میں قتل کے مقدمہ نمبر 172/24 بجرم 302/109/147/148 تھانہ سوہاوہ میں بھی عدالت نے فیصلہ سناتے ہوئے مجرم خاور ظہیر کو عمر قید اور تین لاکھ روپے جرمانہ کی سزا سنادی۔ مجرم نے سال 2024 میں یہ قتل کیا تھا۔ پولیس نے مقدمے کی سائنسی بنیادوں پر تفتیش کی، ملزم کو گرفتار کیا اور ٹھوس شواہد کے ساتھ مقدمہ عدالت میں پیش کیا، جس پر عدالت نے قرار واقعی سزا سنائی۔
ڈی پی او جہلم طارق عزیز سندھو نے دونوں مقدمات میں بہترین کارکردگی دکھانے پر انوسٹیگیشن اور لیگل ٹیموں کو شاباش دی اور تعریفی سرٹیفکیٹس کے ساتھ نقد انعام دینے کا اعلان کیا۔ ان کا کہنا تھا کہ سنگین نوعیت کے مقدمات میں زیرو ٹالرنس پالیسی پر سختی سے عمل کیا جا رہا ہے، اور انصاف کی فراہمی کو یقینی بنانے کے لیے پولیس اپنی تمام تر صلاحیتیں بروئے کار لا رہی ہے۔
