پنڈدادنخان پولیس نے ہرن پور کے قریب دو گروپوں کے درمیان ہونے والے تصادم، عوامی راستہ بلاک کرنے اور امن عامہ میں خلل ڈالنے کے واقعہ کا مقدمہ درج کرتے ہوئے بروقت کارروائی کے دوران 12 ملزمان کو گرفتار کر لیا، جبکہ دیگر ملزمان کی گرفتاری کے لیے کارروائی جاری ہے۔
ترجمان جہلم پولیس کے مطابق گزشتہ روز شام تقریباً 6:30 بجے ہرن پور کے قریب دو گروپوں کے درمیان تلخ کلامی کے بعد جھگڑا شدت اختیار کر گیا۔ دونوں گروپوں کے افراد نے سرعام ایک دوسرے پر لاتوں، مکوں اور ٹھڈوں سے حملہ کیا، جس سے علاقے میں شدید خوف و ہراس پھیل گیا اور شہریوں میں بے چینی پیدا ہو گئی۔
اطلاع ملتے ہی ایس ایچ او تھانہ پنڈدادنخان ملک نثار احمد پولیس نفری کے ہمراہ فوری طور پر موقع پر پہنچے، تاہم پولیس کے پہنچنے سے قبل بیشتر ملزمان موقع سے فرار ہو چکے تھے۔
پولیس نے واقعے کی ویڈیوز، شواہد اور دیگر دستیاب معلومات کی بنیاد پر نامزد اور نامعلوم ملزمان کے خلاف تعزیراتِ پاکستان کی دفعات 341، 283، 147، 149 سمیت دیگر متعلقہ دفعات کے تحت مقدمہ درج کر لیا، جبکہ کارروائی کے دوران 12 ملزمان کو گرفتار کر کے تھانے منتقل کر دیا گیا۔ پولیس کے مطابق دیگر ملزمان کی گرفتاری کے لیے چھاپے مارے جا رہے ہیں۔
ترجمان جہلم پولیس کا کہنا ہے کہ دونوں گروپ ماضی میں بھی متعدد مرتبہ سرعام ایک دوسرے پر حملے اور جھگڑوں میں ملوث رہے ہیں، جس کے باعث علاقے میں خوف و ہراس کی فضا پیدا ہوتی رہی ہے۔ پولیس کے مطابق ایسے عناصر کے خلاف بلاامتیاز قانونی کارروائی جاری رہے گی۔
ایس ایچ او ملک نثار احمد نے کہا کہ عوام کے جان و مال کا تحفظ اور ضلع میں امن و امان کا قیام پولیس کی اولین ذمہ داری ہے۔ انہوں نے واضح کیا کہ قانون کو ہاتھ میں لینے والے افراد کے ساتھ کسی قسم کی رعایت نہیں برتی جائے گی اور ایسے عناصر کے خلاف سخت قانونی کارروائی جاری رکھی جائے گی۔
