جہلم: پنجاب بھر کے تعلیمی اداروں میں موسم گرما کی تعطیلات کا اعلان کر دیا گیا، اسکولز اور کالجز 28 مئی سے بند ہوں گے۔
تفصیلات کے مطابق پنجاب حکومت نے گرمی کی شدت اور ہیٹ ویو کے پیش نظر صوبے بھر کے تعلیمی اداروں میں موسم گرما کی تعطیلات کا باقاعدہ اعلان کر دیا ہے۔ محکمہ اسکول ایجوکیشن اور محکمہ ہائر ایجوکیشن نے اس حوالے سے علیحدہ علیحدہ نوٹیفکیشنز جاری کر دیے ہیں۔
پنجاب کے وزیر تعلیم رانا سکندر حیات کے مطابق صوبے کے تمام سرکاری و نجی اسکولز 28 مئی 2025 سے گرمیوں کی تعطیلات پر چلے جائیں گے۔ اسکول ایجوکیشن ڈیپارٹمنٹ کی جانب سے جاری کردہ نوٹیفکیشن کے مطابق یہ تعطیلات 28 مئی سے 14 اگست 2025 تک جاری رہیں گی، جبکہ آفٹر نون اسکولز 21 مئی سے 15 اگست 2025 تک بند رہیں گے۔
تعطیلات سے قبل اسکولوں کے اوقاتِ کار میں بھی تبدیلی کر دی گئی ہے۔ اب اسکول صبح 7 بج کر 15 منٹ پر کھلا کریں گے اور ساڑھے 11 بجے تک جاری رہیں گے۔
وزیر تعلیم نے والدین، اساتذہ اور طلبہ سے اپیل کی ہے کہ وہ شدید گرمی اور ممکنہ ہیٹ ویو کے دوران احتیاطی تدابیر اختیار کریں تاکہ بچوں کی صحت و سلامتی کو یقینی بنایا جا سکے۔
دوسری جانب ہائر ایجوکیشن ڈیپارٹمنٹ نے بھی صوبے بھر کے سرکاری و نجی کالجز میں تعطیلات کا نوٹیفکیشن جاری کیا ہے۔ اس کے مطابق کالجز بھی 28 مئی سے 14 اگست 2025 تک بند رہیں گے اور تعلیمی سرگرمیاں 15 اگست سے دوبارہ بحال کر دی جائیں گی۔ تاہم امتحانات اپنے مقررہ شیڈول کے مطابق منعقد کیے جائیں گے۔
محکمہ تعلیم کی جانب سے یہ اقدامات بچوں اور اساتذہ کی صحت و سلامتی کے پیش نظر کیے گئے ہیں تاکہ شدید گرمی میں ممکنہ طبی مسائل سے بچا جا سکے۔
