جہلم: پنجاب فوڈ اتھارٹی جہلم نے عیدالاضحیٰ سے قبل بڑی کارروائی کرتے ہوئے بھاری مقدار میں ناقص اور غیر معیاری گوشت پکڑ کر موقع پر تلف کر دیا۔
ترجمان پنجاب فوڈ اتھارٹی کے مطابق کارروائی بالہ گجراں چک جمال روڈ پر قائم ایک میٹ شاپ کے خلاف کی گئی، جہاں تقریباً ایک من ناقص گوشت موجود تھا۔
حکام کے مطابق گوشت پر جعلی سلاٹر ہاؤس کی مہر لگی ہوئی تھی جبکہ ویٹرنری ڈاکٹر نے موقع پر گوشت کا معائنہ کر کے اسے انسانی صحت کیلئے مضر قرار دیا۔
پنجاب فوڈ اتھارٹی نے فوری کارروائی کرتے ہوئے ناقص گوشت تلف کر دیا جبکہ میٹ شاپ کو سیل کر کے بند کر دیا گیا۔ فوڈ اتھارٹی کی مدعیت میں ملزم کے خلاف متعلقہ تھانے میں مقدمہ بھی درج کر لیا گیا ہے۔
ترجمان کے مطابق صوبہ بھر میں ناقص اور غیر معیاری گوشت کے خلاف کریک ڈاؤن جاری ہے اور عوام کی صحت پر کوئی سمجھوتہ نہیں کیا جائے گا۔
پنجاب فوڈ اتھارٹی نے شہریوں سے اپیل کی ہے کہ ناقص خوراک یا غیر معیاری گوشت سے متعلق کسی بھی شکایت کی صورت میں ہیلپ لائن 1223 پر فوری رابطہ کریں۔
