مانچسٹر: برطانیہ کے شہر مانچسٹر میں آرائیں ایسوسی ایشن یوکے کے زیرِ اہتمام آرائیں برادری کے سالانہ پروگرام کا انعقاد کیا گیا۔
تقریب میں مرکزی انجمن آرائیاں پاکستان رجسٹرڈ کے صدر میاں محمد سعید ڈیرہ والے، مرکزی چیف آرگنائزر چوہدری محمد حبیب کنول، وائس چیئرمین الراعی ٹرسٹ چوہدری افتخار بشیر اور ضلعی صدر انجمن آرائیاں پاکستان رجسٹرڈ ضلع جہلم حاجی حبیب الرحمن سمیت برطانیہ میں مقیم آرائیں برادری سے تعلق رکھنے والے خواتین و حضرات کی بڑی تعداد نے شرکت کی۔
آرائیں ایسوسی ایشن یوکے کی جانب سے پاکستان سے تشریف لانے والے معزز مہمانوں کا پرتپاک استقبال کیا گیا۔ اس موقع پر مہمانوں کو پھولوں کے گلدستے پیش کیے گئے جبکہ انہیں خصوصی شیلڈز سے بھی نوازا گیا۔
تقریب میں آرائیں ایسوسی ایشن یوکے کے چیئرمین میاں طارق عزیز، سیکرٹری جنرل میاں راشد ضیاء، سینئر وائس چیئرمین چوہدری محمود الحسن، چیف آرگنائزر چوہدری عبدالکریم، ایونٹ آرگنائزر میاں محمد فاروق، ڈیندی سے فخر اقبال چوہدری، حافظ عبداللہ چوہدری سمیت دیگر عہدیداران اور معزز شخصیات نے شرکت کی۔
تقریب سے خطاب کرتے ہوئے انجمن آرائیاں پاکستان رجسٹرڈ کے مرکزی صدر میاں محمد سعید ڈیرہ والے اور مرکزی چیف آرگنائزر چوہدری محمد حبیب کنول نے آرائیں ایسوسی ایشن یوکے کی جانب سے شاندار پروگرام کے انعقاد کو سراہتے ہوئے منتظمین کو مبارکباد پیش کی۔
مقررین نے کہا کہ دیارِ غیر میں رہتے ہوئے اپنی برادری کے ساتھ تعلق اور خدمت کے جذبے کو زندہ رکھنا قابلِ تحسین اقدام ہے، جس پر آرائیں ایسوسی ایشن یوکے کے عہدیداران خراجِ تحسین کے مستحق ہیں۔ انہوں نے کہا کہ بیرونِ ملک مقیم پاکستانی اپنی برادری کے ساتھ رابطے اور باہمی تعلق کو برقرار رکھتے ہوئے مثبت اور تعمیری سرگرمیوں کے فروغ میں اہم کردار ادا کر رہے ہیں۔
مقررین نے کہا کہ انجمن آرائیاں پاکستان رجسٹرڈ برادری کی قدیم ترین تنظیم ہے، جس کی بنیاد 111 سال قبل برادری اور انسانیت کی فلاح و بہبود کے جذبے کے تحت رکھی گئی تھی۔ الحمدللہ، آج بھی تنظیم اسی مقصد اور خدمت کے مشن کو آگے بڑھا رہی ہے۔
انہوں نے کہا کہ وقت کا تقاضا ہے کہ آنے والی نسلوں کے بہتر مستقبل کے لیے مؤثر اقدامات کیے جائیں، نوجوانوں کی رہنمائی کی جائے اور انہیں اس قابل بنایا جائے کہ وہ مستقبل میں برادری کے ساتھ ساتھ انسانیت کی خدمت میں بھی اپنا کردار ادا کر سکیں۔
مقررین نے اس امر پر زور دیا کہ برادری کا اتحاد، باہمی احترام اور ایک دوسرے کے ساتھ تعاون ہی اجتماعی ترقی کی بنیاد ہے۔ انہوں نے کہا کہ اختلافات سے بالاتر ہو کر مشترکہ مقاصد کے لیے متحد ہونا وقت کی اہم ضرورت ہے، کیونکہ باہمی اتحاد اور تعاون کے ذریعے ہی مثبت اور دیرپا نتائج حاصل کیے جا سکتے ہیں۔
اس موقع پر آرائیں ایسوسی ایشن یوکے کی قیادت نے انجمن آرائیاں پاکستان رجسٹرڈ کی مرکزی قیادت کی تقریب میں شرکت کو اپنے لیے باعثِ اعزاز قرار دیتے ہوئے پاکستان سے تشریف لانے والے معزز مہمانوں کا تہہ دل سے شکریہ ادا کیا۔
آرائیں ایسوسی ایشن یوکے کے عہدیداران نے کہا کہ مرکزی قیادت کی تقریب میں شرکت سے پروگرام کی اہمیت میں مزید اضافہ ہوا اور برطانیہ میں مقیم آرائیں برادری کے لیے یہ لمحہ خوشی اور اعزاز کا باعث ہے۔ انہوں نے مہمانوں کی آمد اور تقریب کو کامیاب بنانے میں تعاون کرنے والے تمام افراد کا بھی شکریہ ادا کیا۔
