جہلم: ڈپٹی کمشنر جہلم میر رضا اوزگن نے ڈسٹرکٹ ہیڈ کوارٹر (ڈی ایچ کیو) ہسپتال جہلم میں اوورسیز فاؤنڈیشن کے تعاون سے زیرِ تعمیر نئے بلاک کا تفصیلی معائنہ کیا اور جاری ترقیاتی کاموں کا جائزہ لیا۔
اس موقع پر چیئرمین اوورسیز فاؤنڈیشن چوہدری پرویز اختر نے ڈپٹی کمشنر کو منصوبے کی پیشرفت اور بلاک میں فراہم کی جانے والی سہولیات کے بارے میں تفصیلی بریفنگ دی۔
انہوں نے بتایا کہ یہ بلاک اوورسیز پاکستانیوں کے تعاون سے تقریباً 10 کروڑ روپے کی لاگت سے ریکارڈ مدت میں مکمل کیا جا رہا ہے تاکہ شہریوں کو جدید اور معیاری علاج معالجے کی سہولیات فراہم کی جا سکیں۔ انہوں نے اس بات کی یقین دہانی بھی کرائی کہ تعمیراتی معیار پر کسی قسم کا سمجھوتہ نہیں کیا جائے گا۔
ڈپٹی کمشنر میر رضا اوزگن نے اوورسیز پاکستانیوں کی خدمات کو شاندار الفاظ میں سراہتے ہوئے کہا کہ بیرون ملک مقیم پاکستانی ملک و قوم کی ترقی میں اہم کردار ادا کر رہے ہیں۔ ڈی ایچ کیو ہسپتال میں تعمیر ہونے والا یہ نیا بلاک جہلم کے عوام کے لیے ایک قیمتی تحفہ ہے۔
انہوں نے ہسپتال انتظامیہ کو ہدایت کی کہ مریضوں کو علاج معالجے کی بہترین سہولیات فراہم کی جائیں، صفائی کے معیار کو مزید بہتر بنایا جائے اور عوام کو صحت کی بنیادی سہولیات کی فراہمی ہر صورت یقینی بنائی جائے۔
ڈپٹی کمشنر نے اس امید کا اظہار کیا کہ نئے بلاک کی تکمیل کے بعد صحت کے شعبے میں نمایاں بہتری آئے گی اور مریضوں کو مزید سہولت اور آسانی میسر آئے گی۔ اس موقع پر اوورسیز فاؤنڈیشن کے جاری منصوبوں کا بھی دورہ کیا گیا۔
