پنڈدادنخان: کھیوڑہ تا چوآ سیدن شاہ نئی تعمیر ہونے والی سڑک افتتاح سے قبل ہی ایک ہی بارش کے بعد جگہ جگہ سے ٹوٹ پھوٹ کا شکار ہو گئی، جس پر شہریوں میں شدید غم و غصہ پایا جا رہا ہے۔
سڑک پر بڑے بڑے گڑھے بننے کے باعث ٹریفک کی روانی بری طرح متاثر ہو رہی ہے، جبکہ شہریوں کو آمدورفت میں شدید مشکلات کا سامنا ہے۔ موٹر سائیکل سواروں اور گاڑیوں کے لیے حادثات کا خطرہ بھی بڑھ گیا ہے۔
علاقہ مکینوں کا کہنا ہے کہ نئی تعمیر ہونے والی سڑک کا اس قدر جلد خراب ہو جانا متعلقہ محکمے اور ٹھیکیدار کی کارکردگی پر سوالیہ نشان ہے۔ شہریوں نے الزام عائد کیا کہ تعمیر میں ناقص میٹریل استعمال کیا گیا، جس کے باعث معمولی بارش بھی سڑک برداشت نہ کر سکی۔
مظاہرین نے اعلیٰ حکام سے فوری نوٹس لینے کا مطالبہ کرتے ہوئے کہا ہے کہ ناقص تعمیر میں ملوث ٹھیکیدار اور ذمہ داران کے خلاف سخت کارروائی کی جائے اور سڑک کو معیاری انداز میں ازسرِ نو تعمیر کیا جائے۔
شہریوں نے خبردار کیا ہے کہ اگر فوری اقدامات نہ کیے گئے تو احتجاج کا دائرہ وسیع کیا جا سکتا ہے، جبکہ عوامی مشکلات میں مزید اضافہ ہو سکتا ہے۔
