جہلم: موسم کے بدلتے ہی مچھلی کی مانگ میں نمایاں اضافہ دیکھنے میں آیا ہے۔
جہلم کے قبرستان چوک میں واقع مچھلی منڈی میں خریداروں کا رش لگ گیا۔ سرد موسم کے آغاز کے ساتھ ہی مچھلی کھانے کے شوقین افراد نے دریائے جہلم اور منگلا ڈیم کا رخ کرنا شروع کر دیا ہے۔
مچھلی کے شوقین شہریوں میں کوئی کالا رہو مچھلی تیار کروانے میں مصروف دکھائی دیا تو کوئی سوہل، سلور، گلفام، کھگا اور چڑا مچھلی کی تلاش میں سرگرداں نظر آیا۔
تاہم شہریوں کا کہنا ہے کہ مہنگائی کے باعث مچھلی کھانا اب عام آدمی کے لیے آسان نہیں رہا۔ گزشتہ سال کے مقابلے میں مچھلی کی قیمتوں میں غیر معمولی اضافہ دیکھنے میں آیا ہے۔ خریداروں کا کہنا ہے کہ مچھلی منڈی میں نرخ اتنے بڑھ چکے ہیں کہ غریب آدمی کے لیے تفریح اور کھانے کا شوق پورا کرنا مشکل ہو گیا ہے۔
واضح رہے کہ موسم کی تبدیلی کے ساتھ مچھلی منڈی کی رونق تو بڑھ گئی ہے، لیکن مہنگائی کے اثرات یہاں بھی نمایاں ہیں۔ گزشتہ سیزن کے مقابلے میں رواں سال مچھلی کی قیمتوں میں تقریباً 50 فیصد اضافہ ریکارڈ کیا گیا ہے۔
