دینہ کے نواحی علاقہ بڑل منگلا کینٹ میں فیتھ بائبل چرچ میں کرسمس کی خوشیوں کے سلسلے میں خصوصی تقریب کا انعقاد کیا گیا، جس میں وزیر مملکت برائے خزانہ و ریلوے بلال اظہر کیانی نے شرکت کی اور کرسچین کمیونٹی کے ہمراہ کرسمس کا کیک کاٹا۔
تقریب سے خطاب کرتے ہوئے بلال اظہر کیانی نے کہا کہ کرسمس صرف ایک مذہبی تہوار نہیں بلکہ محبت، رواداری اور انسانیت کا پیغام ہے۔ انہوں نے مسیحی کمیونٹی کی خدمات کو سراہتے ہوئے کہا کہ مسیحی کمیونٹی پاکستان کی ترقی میں اہم کردار ادا کر رہی ہے اور ہمیشہ پیار اور تعاون کا مظاہرہ کرتی رہی ہے۔
وزیر مملکت نے توشہ خانہ ٹو کیس پر بھی روشنی ڈالتے ہوئے کہا کہ اس کا فیصلہ آئین اور قانون کے مطابق آیا ہے۔ انہوں نے الزام عائد کیا کہ سابق حکمرانوں نے ذاتی مفادات کے لیے قومی خزانہ کو نقصان پہنچایا، جبکہ ملکی اداروں پر حملے اور سیاسی مخالفین پر جھوٹے مقدمات قائم کیے گئے۔ بلال اظہر کیانی نے کہا کہ برطانیہ کی نیشنل کرائم ایجنسی نے 190 ملین پاؤنڈ واپس کیے جبکہ متعلقہ افراد عدالت میں شواہد پیش کرنے میں ناکام رہے۔
تقریب میں کوآرڈینیٹر راجہ علی، سابق چیئر مین یونین کونسل لدھڑ راجہ افرا سیاب، راجہ کامران سیاب، میاں سجاد، راجہ حسن اور مسلم لیگ کے دیگر کارکنان بھی موجود تھے۔ تقریب میں مسیحی برادری کے معززین، مذہبی رہنما اور شہریوں کی کثیر تعداد نے شرکت کی۔
وزیر مملکت بلال اظہر کیانی نے کہا کہ ہم سب کو مل کر محبت اور رواداری کے ذریعے معاشرتی ہم آہنگی قائم کرنی چاہیے اور ہر برادری کے حقوق اور خوشیوں کا احترام کرنا ہمارا فرض ہے۔
