جہلم: محکمہ صحت کی چشم پوشی، ضلع بھر میں عطائی سر عام موت فروخت کرنے لگے۔ محکمہ صحت کے ضلعی ذمہ داران کے دورے کاغذی کارروائیوں تک محدود، اعلی حکام کو سب اچھا ہے کی رپورٹس دینے میں مصروف ہیں۔
تفصیلات کے مطابق محکمہ صحت کے ذمہ داران کی چشم پوشی جہلم شہر سمیت ضلع بھر میں عطائیوں نے کلینکس قائم کررکھے ہیں جہاں پر سٹرائیڈ انجکشنوں کا بے دریغ استعمال کیا جاتا ہے جس کیوجہ سے متعدد موذی امراض جن میں ہیپا ٹائٹس شوگر امراض قلب امراض معدہ جیسے امراض میں مبتلا ہو رہے ہیں۔
متعدد شہری جان سے ہاتھ دھو بیٹھے اور متعدد کے اعضاء ضائع ہوگئے، یہ کلینکس مذبحہ خانوں کی شکل اختیار کر چکے ہیں۔
یہاں یہ امر قابل ذکر ہے کہ ان خود ساختہ کلینکس پر ایم بی بی ایس ڈاکٹرز کے بورڈآویزاں کئے ہوئے ہیں جو روزانہ تو کیا ہفتے میں ایک بار بھی کلینک پر نہیں آتے ،اگر ہم محکمہ صحت کے متعلقہ افسران کے حوالے سے بات کریں تو محکمہ صحت کے ذمہ داران سب کچھ جا ننے کے باوجود خاموش تماشائی کا کردار ادا کررہے ہیں ۔ جس کیوجہ سے انسانوں پر تجربات کرنے والے عطائی ڈاکٹرز لوگوں کو زندگی بھر کے لئے اپاہج بنا رہے ہیں۔
شہری تنظیموں نے ارباب اختیار سے مطالبہ کیا ہے کہ محکمہ صحت کے متعلقہ ذمہ داران کو روزانہ کی بنیاد پر عطائیوں کے کلینکس چیک کرنے کا پابند بنایا جائے تاکہ انسانی جانوں محفوظ بنایا جا سکے۔
