جہلم: بلال اظہر کیانی نے کہا کہ ہمارا مقصد شہریوں کی سہولت ہے ہم روایتی سیاست سے ہٹ کرخدمت کی سیاست پر یقین رکھتے ہیں اورضلع جہلم کی عوام کے بڑے مسائل کوحل کرنا ہمارا مشن ہے۔
ان خیالات کا اظہار پاکستان مسلم لیگ (ن) کے مرکزی رہنما ممبر قومی اسمبلی بلال اظہر کیانی نے ڈپٹی کمشنر جہلم سیدہ رملہ علی کے ہمراہ ترقیاتی منصوبوں بارے اجلاس میں کیا۔ اجلاس میں سال 2024-25میں منظور ہونے والے منصوبوں پر سیر حاصل گفتگو کی۔
انہوں نے کہا کہ ضلع جہلم میں بہت جلد ترقیاتی منصوبو ں پر کام شروع ہو رہا ہے، شہر کے تمام مسائل پر ہماری نظر ہے، شہریوں کو ریلیف فراہم کرنا بہت ضروری ہے۔
ڈپٹی کمشنر جہلم نے بتایا کہ آئندہ مالی سال کے دوران ضلع جہلم کے اہم ترین مسائل خصوصا سیوریج، نکاسی آب، مواصلات کا نظام بحال کیا جائے گا جس کیلئے ممبران قومی اسمبلی کی جانب سے تجویز کی گئی سکیموں کی منظوری خوش آئند ہے۔
اجلاس میں لوکل گورنمنٹ، محکمہ صحت، محکمہ تعلیم، ہائی وے سمیت دیگر منصوبوں کو عملی جامہ پہنانے بارے حکمت عملی پر غور کیا گیا۔
