جہلم: ڈپٹی کمشنر جہلم میر رضا اوزگن کی ہدایات پر محرم الحرام کے دوران عزاداروں کی سہولت اور شدید گرمی کے پیش نظر ضلع جہلم کی چاروں تحصیلوں جہلم، دینہ، سوہاوہ اور پنڈ دادنخان میں خصوصی سبیل کیمپ قائم کر دیے گئے ہیں، جہاں عزاداروں کو ٹھنڈا پانی، جوسز، لنگر اور دیگر بنیادی سہولیات فراہم کی جا رہی ہیں۔
ضلعی انتظامیہ کے مطابق یہ سبیل کیمپ متعلقہ اسسٹنٹ کمشنرز اور میونسپل کمیٹیوں کی زیر نگرانی فعال ہیں۔ کیمپوں پر عزاداروں کے لیے ٹھنڈے، سادہ اور میٹھے پانی کے علاوہ جوسز، لنگر اور دیگر ضروری سہولیات کی فراہمی کو یقینی بنایا گیا ہے، جبکہ صفائی ستھرائی، نظم و ضبط اور بہتر انتظامات پر بھی خصوصی توجہ دی جا رہی ہے۔
ڈپٹی کمشنر جہلم کی جانب سے تمام متعلقہ افسران کو ہدایت جاری کی گئی ہے کہ سبیل کیمپوں پر سہولیات کی بلا تعطل فراہمی، صفائی کے اعلیٰ معیار اور عزاداروں کی آسان رسائی کو ہر صورت یقینی بنایا جائے۔ انہوں نے ہدایت کی کہ شدید گرمی کے پیش نظر ٹھنڈے مشروبات اور پینے کے صاف پانی کی مسلسل دستیابی کو ترجیح دی جائے تاکہ عزاداروں کو کسی قسم کی دشواری کا سامنا نہ کرنا پڑے۔
ڈپٹی کمشنر میر رضا اوزگن نے کہا کہ محرم الحرام کے دوران عزاداروں کی خدمت اور سہولت ضلعی انتظامیہ کی اولین ترجیح ہے۔ انہوں نے کہا کہ تمام متعلقہ محکمے فیلڈ میں متحرک ہیں اور ضلعی انتظامیہ کی بھرپور کوشش ہے کہ عزاداروں کو محفوظ، منظم، صاف ستھرے اور سہولت بخش ماحول میں مذہبی رسومات کی ادائیگی کے لیے ہر ممکن سہولت فراہم کی جائے۔
