جہلم: بارش کے چند قطرے گرتے ہی آئیسکو سرکل کی تمام سب ڈویژن کے بیشتر فیڈر ٹرپ کر گئے۔ گزشتہ روز علی الصبح بند ہونے والی بجلی رات 8 بجے کے بعد بحال ہوئی۔ کالا گجراں گریڈ اسٹیشن سے چلنے والے فیڈرز کے صارفین پورا دن بجلی کی فراہمی کا انتظار کرتے رہے۔
قابل ذکر بات یہ ہے کہ کالا گجراں گریڈ اسٹیشن کا فون نمبر پچھلے کئی ماہ سے بل کی عدم ادائیگی کی وجہ سے منقطع ہے جبکہ متعلقہ سب ڈویژن کے شکایات نمبرز کوئی سننے کے لئے تیار نہیں جبکہ ایس ڈی او ، اور ایکسین صارفین کے فون سننا اپنی توہین سمجھتے ہیں ۔
یہاں قابل ذکر بات یہ ہے کہ پچھلے 2 اڑھائی ماہ سے درختوں کی کٹائی اور لائنوں کی مرمت کے نام پر صبح 9 بجے سے سہ پہر 2 بجے تک بجلی بند کر دی جاتی ہے۔
گزشتہ روز بارش کے چند قطرے گرنے سے آئیسکو سرکل جہلم کی بیشتر سب ڈویژنز میں بجلی بند کر دی گئی اور متعلقہ سب ڈویژن کے عملے نے صارفین کو بتایا کہ لائنوں پر فالٹ آنے کیوجہ سے بجلی کی سپلائی معطل ہو گئی ہے ۔اس طرح پورا دن صارفین بجلی کی فراہمی کا انتظار کرتے رہے۔
صارفین کا کہنا ہے کہ آئیسکو چیف واپڈا گریڈ اسٹیشن کالا گجراں سمیت آئیسکو سرکل کے تمام گریڈ اسٹیشن پر ٹیلیفون کی سہولت مہیا کرنے اور تمام سب ڈویژن میں کمپلیٹ آفس میں ٹیلیفون اٹینڈ کرنے کے لئے ملازم تعینات کریں تاکہ صارفین کو بروقت معلومات کی فراہمی ممکن ہو سکے۔
شہریوں کا کہنا ہے کہ جدید دور میں وٹس ایپ گروپس کے ذریعے بھی آگاہ کیا جا سکتا ہے لیکن سب ڈویژنل آفیسرز اور لائن سپرٹنڈنٹس وٹس اپ گروپ بنانے سے گریزاں ہیں کی وجہ گروپس میں شہری واپڈا کی من مانیاں اور رشوت بارے پوسٹیں شیئر کرتے ہیں۔
