جہلم: چوہدری بلال عارف نے کہا کہ موجودہ ملکی صورتحال میں محکمہ شہری دفاع (سول ڈیفنس) کا کردار پہلے سے کہیں زیادہ اہمیت اختیار کر چکا ہے۔ نوجوانوں کو تنظیم شہری دفاع کا فعال حصہ بنانے اور ان کی تربیت کے لیے ضلع بھر میں خصوصی کیمپس لگائے جائیں گے۔
ان خیالات کا اظہار محکمہ شہری دفاع جہلم کے چیف وارڈن چوہدری بلال عارف نے محکمہ کے دفتر میں منعقدہ ایک اہم اجلاس کے دوران کیا۔ اجلاس میں ایڈیشنل چیف وارڈن سعید احمد، سول ڈیفنس آفیسر محمد بوٹا سمیت محکمہ کے دیگر افسران اور کثیر تعداد میں وارڈنز نے شرکت کی۔ اجلاس کا مقصد موجودہ حالات میں شہری دفاع کو یقینی بنانے، شہریوں میں آگاہی پیدا کرنے اور پاکستان کی مسلح افواج کے ساتھ یکجہتی کا اظہار تھا۔
چیف وارڈن چوہدری بلال عارف نے اجلاس سے خطاب کرتے ہوئے کہا کہ موجودہ حالات کا تقاضا ہے کہ ہر محب وطن شہری بالخصوص نوجوان سول ڈیفنس کا حصہ بن کر ملکی خدمت میں اپنا کردار ادا کرے۔ اس مقصد کے لیے محکمہ سول ڈیفنس جہلم کی جانب سے اسکولوں، کالجوں اور شہر کی اہم شاہراہوں پر تربیتی و آگاہی کیمپس قائم کیے جائیں گے، جہاں نوجوانوں کو رجسٹر کر کے ابتدائی سول ڈیفنس تربیت فراہم کی جائے گی۔
انہوں نے مزید کہا کہ محکمہ شہری دفاع، عوامی خدمت کے جذبے کے ساتھ ہر ہنگامی صورتحال سے نمٹنے کے لیے مکمل تیار ہے اور اس سلسلے میں عوامی شرکت کو یقینی بنایا جا رہا ہے۔
شہریوں اور والدین سے اپیل کی گئی کہ وہ اپنے بچوں کو سول ڈیفنس کی تربیت کے لیے رضاکارانہ طور پر آگے بڑھائیں تاکہ مستقبل میں کسی بھی ہنگامی صورتحال میں بروقت اور مؤثر ردعمل دیا جا سکے۔
