جہلم: تھانہ صدر کے سب انسپکٹر مرزا صداقت علی نے بہترین حکمت عملی اور پیشہ ورانہ مہارت کا مظاہرہ کرتے ہوئے ہنی ٹریپ گینگ کے جال میں پھنسے 19 سالہ نوجوان کو کچے کے ڈاکوؤں کے چنگل سے بحفاظت بازیاب کروا لیا۔
تفصیلات کے مطابق جہلم کے تھانہ صدر کے علاقے کوٹلی اللہ یار کا رہائشی 19 سالہ صائم عاصم ایک لڑکی کے جھانسے میں آ کر اپنے گھر سے چار موبائل فونز اور 20 ہزار روپے نقدی لے کر مبینہ طور پر ملتان روانہ ہو گیا۔ لواحقین کو واقعے کا علم ہونے پر فوراً ایس ایچ او تھانہ صدر مرزا صداقت علی کو اطلاع دی گئی۔
ایس ایچ او نے فوری کارروائی کرتے ہوئے اے ایس آئی عمران امجد سمیت ایک خصوصی ٹیم تشکیل دی۔ ابتدائی تفتیش اور سی سی ٹی وی فوٹیج کے تجزیے سے پتا چلا کہ نوجوان شہر سے نکل چکا ہے۔
مزید سراغ نہ ملنے پر ایس ایچ او نے صائم کے دوستوں سے رابطہ کیا اور موبائل نمبرز کے ذریعے کھوج لگائی۔ کئی گھنٹوں کی کوشش کے بعد ایک نمبر فعال ملا، جس پر رابطہ کر کے صائم کو آگاہ کیا گیا کہ وہ کچے کے علاقے میں لے جائے جانے والا ہے جہاں سے تاوان طلب کیا جا سکتا ہے۔
ایس ایچ او نے مسلسل رابطے اور سمجھانے بجھانے کے بعد صائم کو قائل کیا کہ وہ فوراً واپس لوٹ آئے۔ پولیس ٹیم نے موقع پر پہنچ کر نوجوان کو بحفاظت تحویل میں لے کر لواحقین کے حوالے کر دیا۔
جہلم کی شہری، سماجی، فلاحی اور صحافتی تنظیموں سمیت مختلف مکاتب فکر کے نمائندوں نے ایس ایچ او مرزا صداقت علی کی پیشہ ورانہ مہارت، ذہانت اور بروقت کارروائی پر انہیں خراجِ تحسین پیش کیا۔
