جہلم: ضلعی انتظامیہ جہلم کے زیر اہتمام آزادی میلہ اختتام پذیر، آخری دن معروف لوک فنکار سائیں ظہور کی شاندار پرفارمنس، شہریوں نے بڑی تعداد میں شرکت کی۔
تفصیلات کے مطابق ضلعی انتظامیہ جہلم کے زیر اہتمام آزادی میلہ چار روز جاری رہنے کے بعد اختتام پذیر ہو گیا۔ آخری روز معروف لوک فنکار سائیں ظہور کی شاندار پرفارمنس نے شہریوں کو جھومنے پر مجبور کر دیا۔
ہزاروں کی تعداد میں شہری میلہ کے آخری روز فیملیوں سمیت پہنچ گئے۔ بچوں کی بڑی تعداد جھولوں سے لطف اندوز ہوتی رہی، چار روزہ میلہ کے دوران قومی سطح کے فنکاروں، گلوکاروں اور ثقافتی طائفوں نے شرکت کی۔
13 سے16 اگست کے دوران گورنمنٹ کمپری ہینسو سکول کے گراؤنڈ میں میوزک نائٹ، ماسکوٹ پریڈ، روایتی کھانے، میجک شو، دستکاری سکول جیسے پروگرام منعقد ہوئے۔ جشن آزادی کے حوالے سے پنجاب میں سب سے بڑا میلہ ضلع جہلم میں منعقد کیا گیا۔
میلہ کے تمام دنوں میں ڈپٹی کمشنر جہلم سیدہ رملہ علی سمیت ضلع کے تمام افسران نے فیملیوں سمیت شرکت کی اور شہریوں کے ساتھ میلہ سے لطف اٹھایا۔ آزادی میلہ کے آخری روز میلہ کے انعقاد میں اہم کردار ادا کرنے والے افسران و ملازمین میں سرٹیفکیٹ تقسیم کئے گئے۔
ڈپٹی کمشنر جہلم سیدہ رملہ علی نے اختتامی خطاب میں کہا کہ پنجاب حکومت کی جانب سے جشن آزادی کے موقع پر شہریوں کی تفریح کے لیے یہ میلہ منعقد کیا گیا۔ جس میں ہزاروں کی تعداد میں شہریوں کی روزانہ شرکت نے اس کو کامیاب بنایا۔ضلعی انتظامیہ شہریوں کی سہولت کی خاطر دن رات کوشاں ہے۔
