جہلم پولیس کی جانب سے ضلع بھر میں دہشت گردوں، جرائم پیشہ عناصر اور سماج دشمن افراد کے خلاف کریک ڈاؤن کے سلسلے میں سپیشل سرچ آپریشنز اور ناکہ بندی کی گئی۔
ترجمان جہلم پولیس کے مطابق ان کارروائیوں کا مقصد عوام کے جان و مال کا تحفظ یقینی بنانا اور اہم تنصیبات کی سیکیورٹی کو فول پروف بنانا ہے۔
ڈی پی او جہلم طارق عزیز سندھو کی ہدایت پر ضلع بھر میں 13 مختلف مقامات پر سرچ آپریشنز کیے گئے جن کے دوران 435 افراد کی جانچ پڑتال کی گئی۔ شہریوں کی شناخت اور تصدیق جدید پولیس ایپلیکیشنز کے ذریعے عمل میں لائی گئی تاکہ کسی بھی مشتبہ شخص یا مجرم کو قانون کی گرفت میں لایا جا سکے۔
ان کارروائیوں کے دوران شہر کے داخلی و خارجی راستوں پر خصوصی ناکہ بندی کر کے گاڑیوں اور افراد کی سخت چیکنگ کی گئی۔ پولیس کا کہنا ہے کہ ان آپریشنز کا مقصد غیر قانونی اسلحہ اور منشیات کی برآمدگی، مجرمان اشتہاریوں کی گرفتاری اور شرپسند عناصر کو ان کے مذموم عزائم سے باز رکھنا ہے۔
ڈی پی او جہلم نے واضح کیا کہ ایسے سرچ آپریشنز مستقبل میں بھی تسلسل سے جاری رہیں گے تاکہ امن و امان کی فضا کو قائم رکھا جا سکے اور عوام میں قانون نافذ کرنے والے اداروں پر اعتماد مزید مضبوط ہو۔
