جہلم شہر اور گردونواح میں تجاوزات کا دوبارہ قیام، انتظامیہ کی کارکردگی پر سوالیہ نشان! شہریوں نے تجاوزات قائم کرنے والوں کے خلاف فوجداری مقدمات درج کرنے کا مطالبہ کر دیا۔
تفصیلات کے مطابق جہلم میں میونسپل کمیٹی کے شعبہ انسداد تجاوزات نے کچھ عرصہ قبل شہر کے بازاروں اور ملحقہ علاقوں میں قائم تجاوزات ختم کروائی تھیں، لیکن بدقسمتی سے انکروچمنٹ فورس اس پر عمل درآمد برقرار رکھنے میں بری طرح ناکام نظر آ رہی ہے۔
جہلم شہر کی گلی محلوں، بازاروں اور گردونواح میں ایک بار پھر ٹھیلے، ریڑھیاں اور بڑے بڑے کاؤنٹر لگائے جانے کا سلسلہ شروع ہو چکا ہے، جس سے شہریوں کو شدید مشکلات کا سامنا ہے۔
شہریوں کا کہنا ہے کہ تجاوزات مافیا انتظامیہ کی مبینہ ملی بھگت یا نااہلی کا فائدہ اٹھا کر دوبارہ سرگرم ہو گیا ہے، جس کے باعث پیدل چلنے والے افراد اور ٹریفک کی روانی شدید متاثر ہو رہی ہے۔
عوامی حلقوں نے تجاوزات قائم کرنے والے عناصر کے خلاف سخت قانونی کارروائی اور فوجداری مقدمات درج کرنے کی اپیل کرتے ہوئے کہا ہے کہ اگر انتظامیہ نے بروقت ایکشن نہ لیا تو شہری سڑکوں پر نکلنے پر مجبور ہوں گے۔
اس صورتحال پر شہریوں نے کمشنر راولپنڈی، ڈپٹی کمشنر، ایڈمنسٹریٹر میونسپل کمیٹی، چیف آفیسر میونسپل کمیٹی اور دیگر متعلقہ حکام سے فوری کارروائی کا مطالبہ کیا ہے۔
