جہلم کے ہونہار طالبعلم عبداللہ کی کرغیزستان میں شاندار کامیابی، میڈیکل یونیورسٹی میں ٹاپ پوزیشن، 70 سے زائد ایوارڈز اپنے نام کر لیے۔
تفصیلات کے مطابق جہلم شہر سے تعلق رکھنے والے ہونہار طالبعلم عبداللہ ولد نوید انجم نے کرغیزستان کی معروف میٹروپولیٹن یونیورسٹی سے میڈیکل کی ڈگری نہ صرف کامیابی سے مکمل کی بلکہ یونیورسٹی بھر میں ٹاپ پوزیشن حاصل کر کے ملک و قوم کا نام روشن کر دیا۔
پانچ سالہ میڈیکل پروگرام کے دوران عبداللہ نے غیر معمولی کارکردگی کا مظاہرہ کرتے ہوئے 70 سے زائد نمایاں ایوارڈز حاصل کیے، جن میں آؤٹ اسٹینڈنگ اکیڈمک پرفارمنس ایوارڈ، اکیڈمیک ایکسیلنس ایوارڈ، بیسٹ اسٹوڈنٹ ایمبیسیڈر شیلڈ، ہائی مارکس سکورنگ ایوارڈ، ریگولیٹری ایوارڈ، رول آف آنر، ویلیڈکٹورین اسپیچ ایوارڈ اور پریذیڈنٹ ایوارڈ شامل ہیں۔
عبداللہ نہ صرف تعلیمی میدان میں نمایاں رہے بلکہ قائدانہ صلاحیتوں کا بھی بھرپور مظاہرہ کیا۔ دورانِ تعلیم وہ مختلف اہم عہدوں پر فائض رہے جن میں گروپ لیڈر، سمسٹر ہیڈ، یونیورسٹی وائس پریذیڈنٹ، یونیورسٹی سٹوڈنٹ افیئرز کے نمائندہ اور اسٹوڈنٹ یونین کے صدر شامل ہیں۔ علاوہ ازیں، انہوں نے پاکستان ایمبیسی بشکیک میں گُڈوِل ایمبیسیڈر کی حیثیت سے بھی فرائض انجام دیے۔
عبداللہ کی اس شاندار کامیابی پر ضلع جہلم کے تعلیمی، سماجی اور عوامی حلقوں نے انہیں دل کی گہرائیوں سے مبارکباد پیش کرتے ہوئے ان کی محنت، عزم اور لگن کو قابلِ فخر قرار دیا ہے۔ ان کا کہنا ہے کہ عبداللہ جیسے باصلاحیت نوجوان ہی پاکستان کا روشن مستقبل ہیں۔
