جہلم: محکمہ سول ڈیفنس جہلم کا غیر قانونی ایل پی جی اور پٹرولیم مصنوعات فروخت کرنے والوں کے خلاف کریک ڈاؤن، 2 دکانوں کو سیل کر کے مقدمہ درج کر لیا گیا۔
تفصیلات کے مطابق ڈپٹی کمشنر جہلم میثم عباس کی ہدایت پر سول ڈیفنس آفیسر چوہدری اشفاق احمد کی زیر نگرانی ضلع بھر میں غیر قانونی ایل پی جی اور پٹرولیم مصنوعات فروخت کرنے والوں کے خلاف بھرپور کریک ڈاؤن جاری ہے۔
حالیہ کارروائی میں دو غیر قانونی دکانوں کو سیل کر دیا گیا جبکہ پٹرول مشین سمیت پٹرول قبضے میں لے کر متعلقہ دکان مالکان کے خلاف سوہاوہ کے تھانہ ڈومیلی میں مقدمہ درج کروا دیا گیا۔
سول ڈیفنس آفیسر چوہدری اشفاق احمد نے بتایا کہ گزشتہ تین ماہ کے دوران غیر قانونی کاروبار کرنے والوں کو مجموعی طور پر 3 لاکھ 20 ہزار روپے جرمانہ کیا گیا ہے۔
انہوں نے خبردار کیا کہ غیر قانونی طور پر ایل پی جی اور پٹرولیم مصنوعات فروخت کرنے والوں کے خلاف سخت قانونی کارروائی جاری رہے گی تاکہ عوامی جان و مال کا تحفظ یقینی بنایا جا سکے۔
