لندن: پاکستان سینٹر ونرڈن گرین کے چیئرمین اورممتاز سیاسی و کمیونٹی کونسلر طارق ڈار ایم بی ای کوبرنیٹ کا بلامقابلہ میئر منتخب کر لیا گیا ہے۔ انہیں میئر بنانے کی تقریب بدھ کی شام برنیٹ کونسل کے سوک سینٹر میں منعقد ہوئی جس میں ان کی اہلیہ کو بھی میئرس بنایا گیا۔
2 اعشاریہ 1 ارب پونڈ کا خطیر بجٹ رکھنے والی اس کونسل میں اس سے قبل کونسلر احمد شہزاد اور کونسلر ارشد ڈار سمیت کئی پاکستانی و ایشیائی میئر منتخب ہو چکے ہیں۔ جبکہ کونسل کے لیڈر کونسلر اصغر بٹ بھی پاکستان نژادہیں۔
کونسلر طارق ڈار ایم بی ای کو میئر اور ان کی اہلیہ کو میئرس بنائے جانے کے بعد جب چیمبر میں لایا گیا تووہاں موجود کونسلروں، ارکان پارلیمنٹ، کمیونٹی شخصیات اور نومنتخب میئر کے عزیز و اقارب نے کھڑے ہو کر ان کا استقبال کیا اور انہیں شاندار الفاظ میں خراج تحسین پیش کیا۔
اس موقع پر اپنے خطاب میں میئر کونسلر طارق ڈار ایم بی ای نے کہا کہ برٹش پاکستانی گزشتہ سات دہائیوں سے برطانیہ کی معیشت کی ترقی کے لئے خدمات دے رہے ہیں اور دنیابھر سے آنے والی اقوام نے برطانیہ کو ایک ملٹی کلچرل ملک بنا دیا ہے۔ انہوں نے برٹش پاکستانی برطانیہ کی سیاست میں بھی اپنا اہم کردار اداکر رہے ہیں اور نوجوان نسل بہتر طور پر اس معاشرے کا حصہ بن رہی ہے۔
تقریب میں موجود ارکان پارلیمنٹ اور کمیونٹی رہنمائوں کا کہناتھاکہ طارق ڈار ایم بی ایاور ان کا خاندان گزشتہ 60 سال سے زیادہ عرصے سے برطانیہ خصوصاً برنیٹ کے لوگوں اور برٹش پاکستانیوں کی خدمت کر رہا ہے۔
انہوں نے کہا کہ کونسلر طارق ڈار کمیونٹی کے کاموں کے ساتھ بے گھر اور بیروزگار افراد کی بھی مدد کر رہے ہیں۔ پاکستان کو جب بھی ان کی ضرورت پڑتی ہے، یہ تن ، من دھن سے اس کے لئے حاضر ہوتے ہیں۔ کونسلر طارق ڈار ایم بی ای ایک سچے پاکستانی ہیں، ان جیسے لوگوں کو پارلیمنٹ کے اندر بھی کمیونٹی کی نمائندگی کرنی چاہئے۔
تقریب میں لارڈ ضمیر چوہدری،یاسمین قریشی ایم بی، ممتاز کاروباری شخصیات ناہید رندھاوا، سید قمر رضا، کونسلر محبوب چوہدری، نجیب احمد، چوہدری مظفر، تھرڈ ورلڈ سالیڈیرٹی کے چیئرمین ارشد جمیل، ولتھم فاریسٹ کے سابق میئر کونسلر لیاقت علی، ممتاز شاعر و دانشور عقیل دانش، کونسلر طارق ڈار کے بھائی خالد ڈار سمیت ان کے عزیز و اقارب اور کمیونٹی شخصیات نے بڑی تعداد میں شرکت کی۔
